Nu 1. leidz 3. juļam Leiksnu pīskandynuos jaunuos latgalīšu muzykys festivals “Muzykys Skrytuļs”.

Festivala pyrmuo dīna byus Latgalīšu dorba dīna, 19:00 festivalu atkluos etno muzykys koncerts, 22:00 gaidoma leluo latgalīšu sasadzīduošona, 23:00 večerinka ar dančim. Nu pušnakts da reita trejim ļustēt varēs latgalīšu muzykys diskotekā.

Sovukuort 2. juļs byus Latgolys skaistuos dobys dīna. Iz Mozuos skotuvis nu 16:00 izskanēs dīnys koncerts, nu 19:00 nakts koncerts iz Leluos skotuvis. Nu pušnakts leidz reita sešim ļusteiga doncuošona latgalīšu muzykys diskotekā.

Pyrmajā i ūtrajā festivala dīnā paradzātys vysaidys nūtikšonys bārnim i vacuokim. 1. julī nūtiks pleners „Muokslys Sktytuļs” i muokslinīku dorbus varēs apsavērt pyrmajuos divuos „Muzykys Skrytuļa” dīnuos, kai ari apmeklēt omotnīku tierdzeņu.

Festivala nūslāguma dīna byus Gora dīna, 9:30 Leiksnys Ruomys Vyssvātuokuos Jezus Sirds bazneicā byus Svātku dīvkolpuojums i 11:00 goreiguos muzykys koncerts.