“Muzykys skrytuļs” Leiksnā jau itymā nedeļgolā

“Muzykys skrytuļs” Leiksnā jau itymā nedeļgolā

Daugovpiļs nūvoda Leiksnā nu 1. da 3. juļa jau sastū reizi nūtiks leluokais jaunuos latgalīšu muzykys festivals “Muzykys Skrytuļs‟, salosūt kūpā muzikus, kurī vysaidūs žanrūs roda dzīsmis latgaliski, informej Leiksnys pogosta Kulturys noma vadeituoja Sanita Pinupe.

Pīktdiņ, kod gūdā tiks caltys latgalīšu dorba tradicejis,  jau nu 19.00 nūtiks Etnomuzykys koncerts, kurymā pīsadaleis Leiksnys pogosta KN VPDK “Daugaveņa”, F/k Dyrbyni, Etnografiskais ansamblis “Vabaļis”, Ivars Štubis (Australeja), LgSC folklorys kūpa “Ceidari”, deju kolektivs i kapela “Dziga”. Koncerta nūslāgumā pyrmū reizi festivala viesturē nūtiks leluo latgalīšu sasadzīduošona kūpā ar folklorys kūpu “Ceidari”. Vokora gaitā kluotynasūšī tiks aicynuoti iz daņčim ar grupu “Rikši”, F/k “Dyrbyni” i kapelu “Dziga”. Sovukuort pušnaktī iz leluos skotuvis muzicēs grupa “Straume”.

Sastdiņ, Latgolys skaistuos dobys dīnā, nūtiks diveji koncerti. Dīnys koncertā jau nu 16.00 uzastuos VIA “Nagaidama prīca”, Ivars Štubis (Australeja), Vokaluo studeja Stage On, Daiņs Adijāns, Grupa “Poezijos medžiotojai” (Lītova), Laura Bicāne, Džeina Gavare ar grupu i Vinsents Kūkuojs.

Nakts koncertā 19.00 iz leluos skotuvis spielēs: Projekts “Jezups i muosys”, Projekts “Brigita&co”, Piparmētra, Unknown Artist, 3. Ņutona lykums, Trikmins, Voiceks Voiska, METRS i Gandreiž 10nīkā.

Kluotyn pi koncertu festivala laikā nūtiks pleners “Muokslys Skrytuļs”, byus apsaverama muokslinīku dorbu izstuode, dorbuosīs omotnīku tierdzeņš i bārnu piļsieteņa, kai ari piec koncertu sevkurs varēs izadoncuot latgalīšu muzykys diskotekā, kū pīduovuos DJ Gatis i DJ Wii.

Svātdiņ festivala nūslāgumā Leiksnys Vyssvātuos Jezus Sirds Rūmys katuoļu bazneicā nūtiks goreiguos muzykys koncerts, kurymā goreiguos dzīsmis izdzīduos Laura Bicāne, Leiksnys pogosta KN sīvīšu vokalais ansamblis “Elēģija”, Jūlija Peceviča, Leiksnys Vyssvātuos Jezus Sirds Rūmys katuoļu bazneicys draudzis bārnu i jaunīšu kors, Leivuona nūvoda Kulturys Centra jauktais kors “Rubus” i Vyšku veiru kors “Mōls”. Itymā koncertā nūtiks pyrmatskaņuojums Leiksnā dzeivojūšūs grafu Plāteru prīškteča Broel – Plater Maria 1874. godā saraksteitajai dzīsmei “Vieni o bella: serenata”, kū izpiļdeis Jūlija Peceviča.

Jaunuos muzykys festivala “Muzykys Skrytuļs‟ reikuošona tyka aizsuokta 2005. godā ar mierki popularizēt latgaliskū ideņtitati i sekmēt jaunu dzīšmu radeišonu latgaliski. Festivala moto ir “Kruot var na tikai naudu”, partū festivals vysim apmaklātuojim ir bez moksys.

MS afisa 2016

Kalenders

Apr
25
Pīk
09:00 “Satiec savu meistaru 2025” @ Latgola
“Satiec savu meistaru 2025” @ Latgola
Apr 25 @ 09:00 – Apr 27 @ 16:00
Jau 17. reizi aprelī vysā Latvejā nūteik kasgadejais pasuokums “Satiec savu meistaru!”, kura laikā sevkurs interesents ir aicynuots dūtīs pi meistaru īpazeit i paraudzeit vysaidys tradicionalūs omotu prasmis.   Vaira par nūtikšonom Latgolā var izzynuot[...]
Apr
26
Sai
11:00 Sasatikšona ar Juoni Pampi @ Kuorsovys kulturviesturis centrys "Līču mājas"
Sasatikšona ar Juoni Pampi @ Kuorsovys kulturviesturis centrys "Līču mājas"
Apr 26 @ 11:00 – 12:30
Sasatikšona ar Juoni Pampi @ Kuorsovys kulturviesturis centrys "Līču mājas"
14:00 Rotko muzeja kruojuma izstuodis ... @ Ventspiļs Livonejis ordiņa piļs
Rotko muzeja kruojuma izstuodis ... @ Ventspiļs Livonejis ordiņa piļs
Apr 26 @ 14:00 – 15:00
Izstuodē apsaverami Silvys Linartis, Ilzis Volontis, Mārītis Klušys, Dacis Pudānis, Ilonys Linartis-Ružys, Annys Grinčukys (Latveja), Barbarys Gailis (Latveja, Fraņceja), Petrys Heitketeris (Petra Heitkötter, Vuoceja), Karo Jostys (Caro Jost, Vuoceja), Martina Fosvinkela (Martin Voßwinkel, Vuoceja), Izabelys[...]