Kolupa pogosta puorvaļde 1. – 2. julī, svietejūt pogosta pastuoviešonys 150 godus, reikoj Kolupa nūvodnīku ūtrū saītu “Gaidom gostūs Kolupā”, informej Daugovpiļs nūvoda Kulturys puorvaļdis vadeituoja Ināra Mukāne.

Nūvodnīku saīta programā planavuotys vairuokys nūzeimeigys aktivitatis, kas finansiali sajāmušys atbolstu Vaļsts kulturkapitala fonda mierkprogramys “LATVIJAI – 100” projektā “Kalupes pagasta kultūras zīmes Latvijas stāstā”.

1. julī 17.00 Kolupa pamatškolā tiks atkluota Kolupa nūvodnīka, īvāruojamuo Latvejis presis fotografa i fotomuokslinīka Ilmāra Znuotiņa dorbu izstuode “Latgales ļaudis”.

I. Znuotiņš: “Tys, kū labi zynom, ruodīs tik parosts i kasdīnišks, ka naīvārojam sovpateigū, unikalū i pagaistūšū. Īrūsmi fotografēt Latgolā sajiemu nu sova drauga dāņu fotografa Siga Stasiga, kurs, gastejūt munā tāva sātā Logocku solā Kolupā 1992. godā, saceja: “Fotografej, dreiži tuo vysa, pyrmotnejuo, unikaluo nabyus, mums Dānejā vaira nav.” Muns foto projekts ir baļsteits iz vizualu stuostu par vīnkuoršajim, jaukajim Latgolys ļaudim, par jūs dzeives rytu, kurymā nūzeimeigu vītu ījam ticeiba Dīvam, i niule, i ari tod, kod bazneicā īt īsadrūsynuoja na kotrys. Nu latgalīši guoja i vys vēļ īt. Cylvāks, Dīvs, Dorbs ir itūs ļaužu dzeivis pamats”.

Ūtrei Vaļsts kulturkapitala fonda mierkprogramys projekta aktivitate saisteita ar Kolupa Vyssvātuokuo Oltora Sakramenta Rūmys katuoļu bazneicys viesturi i kulturys montuojumu. Bazneicys suonu jūmūs ir izvītuotys treis granita pluoksnis (epitafejis) ar tekstim latīņu volūdā. Daugovpiļs Universitatis Latgolys pietnīceibys instituts viesturis doktora Henriha Soma vadeibā veics itūs pluokšņu (epitafeju) teksta izpieti. Epitafejis veļteitys Kolupa bazneicys cielieju – grafu Plāteru-Zībergu saimis pīmiņai. Pravests Andrejs Agluonietis ir puortulkuojs itūs tekstus nu latīņu volūdys. Projekta ītvorūs tiks izgataveitys informativys pluoksnis ar epitafeju saturu latvīšu volūdā, kas bazneicā tiks atkluotys 2. julī.

Sovukuort arhitektis i nūvodpietneicys Gertrūdis Rasnačis vadeibā teik veiduota izstuode “Kalupes pagasts laiku lokos”, kas attaiseis daudzys Kolupa dzymtu i sātu viesturis puslopys i stuosteis par Kolupa pamatškolu, izgleiteibys sajimšonu, kolupīšu dīnastu Pīterburgā 20. gs. suokuos, ari par dzeivi kolhozā. Eipaša ekspoziceja byus veļteita Kolupa pogosta darbeibai pyrmuos breivvaļsts laikā.