Cik pamatuotys ir šaubys par latgalīšu lojalitati i pīdereibys izjiutu Latvejai? Voi tū ir vajadzeigs puorbaudeit? Latvejis drūšeibys pietejumā, kū gataveja Nacionaluos Aizsardzeibys akademejis Drūšeibys i strategiskuos pietnīceibys centrys, pīvārsta leluoka viereiba Latgolai i cyta storpā secynuots, ka taišni latgaliski runojūšūs latvīšu gataveiba aizstuovēt Latveju ir vysaugstuokuo. Diskusejā par lojalitati i drūšeibu pīsadola pietejuma leidzautors, pietnīks Muorteņš Hiršs, latgalīšu aktivists, Latgolys entuziastu grupys “Biļdis” dalinīks Sergejs Čakāns, kas pyrmuok izsacejs kritiku par pietejuma ideju, kai ari Austris Keišs, jis studējs politikys zynuotni i pietejs pīrūbežys jaunīšu politiskū leidzdaleibu i aizbraukušū latgalīšu motivaceju atsagrīzt Latvejā.

Ar aizbraukšanu saisteits “Vuordineicys” temats. Valentins Lukaševičs i Arņs Slobožanins runoj par vuordim “tukšums” i “dīks”. Vidis aizsardzeibys i regionaluos atteisteibys ministreja ziņoj, ka Latgolā iz vīnu kvadratkilometru ir daudz mozuoks cylvāku skaits kai cytur Latvejā. Arņs i Valentins skaidroj, ka tukšs na vysod nūzeimoj koč kū nalobu.