Juļa beiguos Rēzeknē svieteis svātkus

Juļa beiguos Rēzeknē svieteis svātkus

Tyvojās svātku nedeļa Rēzeknē – nu 24. da 31. juļa nūtiks Eiropys tautu festivals, Storptautyskais etno festivals “Gosti” i Rēzeknis piļsātys svātki, informej pošvaļdeibys agenturys “Rēzeknes Kultūras un tūrisma centrs” reklamys specialiste Maija Upeniece.

Eiropys tautu festivala (ETF) (European People Festival) dalinīki Rēzeknē īsarass 24. julī nu Beļgejis, Dānejis, Sūmejis, Fraņcejis, Vuocejis, Ungarejis, Īrejis, Italejis, Lītovys, Luksemburgys, Pūlejis, Portugalis, Spānejis, Lelbritanejis i Latvejis.

Eiropys tautu festivals Latvejā nūtiks jau ūtrū reizi, pyrmūreiz Rēzekne ETF dalinīkus sajēme 2008. godā, nu festivals aizasuoce 1992. godā i nu tuo laika kotru godu nūteik cytā Eiropys vaļstī. ETF mierkis ir sekmēt sovstarpejū sapratni Eiropys tautu vydā i dūt vareibu īpazeit cytu vaļstu kulturu i tradicejis.

ETF ītvorūs Rēzeknē byus i daudznacionala kulturys programa i daleibvaļstu izstuode–tierdzeņš (Eurovillage), kai ari nūtiks konkursi i saceņseibys vysaiduos disciplinuos: basketbolā i futbolā, florbolā i pludmalis volejbolā, petankā i jautrajuos spēlēs, īlu teatra muokslā, gleznuošonys, foto i kulinarejis konkursūs.

Ituo gods ETF golvonuo tema ir gasteiba (Hospitality), partū ka nedelis laikā Rēzekne sajims gondreiž tyukstūšu svātku dalinīku, jemūt vārā, ka reizē nūtiks ari etno festivals “Gosti” i Piļsātys svātki. Taipat gasteiba ir tykums, kas jau nu seneju laiku pīmeit latgalīšim – gosti vysod tiks sagaideiti ar patīsu sirds syltumu, goldā calti lobuokī iedīni i dzierīni, nu īļusteits ar skaistom dzīsmem i dejom.

VIII Storptautyskais etno festivals “Gosti” Rēzeknē nūteik kotru ūtrū godu i tymā pīsadola vysaidu tauteibu nacionalī kolektivi, aicynojūt iz sasadzīduošonu i ļusteigu kūpā byušonu, car tautys muzyku i dejom vaicojūt i atrūnūt sovstarpejūs tyltus, kur sasatikt.

25. julī Eiropys tautu festivala dalinīki puļcēsīs Rēzeknis leluokajā dīvnomā iz svineigu dīvkolpuojumu, nu vokorā nūtiks ETF atkluošonys guojīņs i koncerts Festivala parkā. Kotru vokoru koncertūs pīsadaleis i festivala daleibvaļstu kolektivi, i varēs ļustēt vysaidūs deju ritmūs. Pyrmūdīnis vokorā izastuos Roberto Meloni i grupa “Mussiq”.

26. julī kantri muzykys koncertā izastuos grupa “Jauna diena” i Muorteņš Jātnieks, kurs naseņ izdevs pyrmū solo albumu “Ceļš taktīs” i viestej par sovu ceļu muzykys pasaulī.

27. julī latgalīšu daņču vokorā riezeknīši i gosti varēs ļustēt ar kapelu i deju kūpu “Dziga”, deju kūpu “Vadži”, folklorys draugu kūpu “Vīteri”, nu koncerta nūslāgumā prīcynuos etnoroka grupa “Laimas muzykanti”.

28. juļa vokorā izastuos šlagermuzykys aptauju laureati “Baltie lāči”, aicynojūt izdoncuot valšus i ļautīs vosorys zaļumbala prīcai.

29. julī Rēzeknis piļskolnā pīktdīnis vokorā tradicionali vaļdeis vydslaiku nūskanis i varēs vērtīs i vydslaiku ceinis, i vuiceitīs vydslaiku dejis, kai ari baudeit grupys “Obscurusorbis” muziciešonu. Sovukuort Festivala parkā īsuokumā skateituojus prīcynuos šova “Supernova” superfinala dalinīki – grupa “MyRadiantU”, nu vokora nūslāgumā uzastuos ituo gods “Eirovīzijas” finalists Justs Sirmais.

30. julī Rēzeknis Kulturys i atpyutys parkā i Raiņa īlā varēs īsasaisteit rodūšajuos darbneicuos, kūpeigai veiduot simbolisku Rēzeknis rūzi, raksteit vieliejumus piļsātai, pīsadaleit sportiskuos aktivitatēs, apsavērt retro auto moto izstuodi i ļustēt, dzīžūt i sadoncojūt jautrus daņčus. 15.00 Kulturys i atpyutys parkā izskanēs festivala “Gosti” dyžkoncerts “Satikšanās tilti”, puļcejūt ap 200 dalinīku nu Latvejis, Pūlejis, Boltkrīvejis, Ukrainys i Krīvejis.

Vokorā nūtiks tradicionalais Rēzeknis svātku guojīņs pa Atbreivuošonys aleju da Festivala parka, nu 20.30 Festivala parkā varēs baudeit koncertprogramu – vysupyrma izskanēs Rēzeknis dzīsme “Pilsēta ar rozi matos” Aminatys i bārnu popgrupys “Šurumburum” izpiļdejumā, gaisā izliduos 731 balons ar dīnā raksteitajim vieliejumim, piec tam koncertšovā “Tā nav dzīve, tas ir kino” Latvejis popularī muziki i akteri (Daiņs Skutelis, Baiba Berķe, Muorteņš Brūveris, Jurs Jope, Annija Putniņa, Anmary, Juoņs Bukelis, Belinda Remese, Eva i Kaiva Molleres, Inta Broka), deju studeja “BUMP”  i “Kino orķestris” Jura Kristona vadeibā ļaus izdzeivuot pasauļa popularuokuos kinys i muziklus, kas nūsaslēgs ar svātku salutu.

31. julī, kai īrosts svātku svātdīnē, reits īsasuoks ar tradicionalū Saimu paruodi, kas puorīs dzīšmu i deju šovā saimem Festivala parkā. Itūgod AS “Latvijas Zaļais punkts” aicynoj īsasaisteit foto orientiešonuos saceņseibuos “Šķirošanas skrējiens Rēzeknē!”, taipat bārnus puorsteigs i zīpu burbuļu šovs, i putu bals, kai ari Sanktpīterburgys teatra “Pežo kunga ceļojūšuos lelis” interaktivuo programa i “Karnevāla tērpu darbnīca”.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]