Muzejā “Ondrupinis lauku sāta” ir vareiba apsavērt muokslinīka Aivja Pīzeļa dorbus, kas tyka izstuodeiti sadarbeibā ar bīdreibu “Teira Latgolys muoksla”, viestej Dagdys nūvoda sātyslopa. Bīdreibys dalinīki gryb īpazeistynuot cylvākus ar jaunajim Latgolys muokslinīkim, kab popularizātu jūs dorbus.

Muokslinīks ir dzims 1988. godā  Preiļūs. 2009. godā pabeidzs Rēzeknis Muokslys i dizaina vydsškolu. 2013. godā Latvejis Muokslys akademejis (LMA) Latgolys filialē sajimts bakalaura grads i 2015. godā LMA – magistra grads gleznīceibā. Rodūšuo darbeiba suokumā saisteita ar Latgolys nūvodu – tuo dobu, cylvākim. Tū aplīcynoj reikuotuos izstuodis Preiļūs, Daugovpilī, Rēzeknē, Leivuonā, Jākubpilī i Ludzā. Vāluok pīsavīnuoja ari izstuodis Reigā. Nu 2007. goda aktivi pīsadola plenerūs, grupu izstuodēs i reikoj personalizstuodis.

Sovūs dorbūs Aivim ir svareigi saglobuot ritma dinamiku, kruosu kontrastus, tīšumu i teireibu. Gleznys viestej par konkretuos šaļts puordzeivuojumim, partū ka autors skaita, ka gleznuošona ir atsadūšona īkšejom izjiutom. Gleznīceibys volūda īsadorboj pamatā iz cylvāka emocejom, na juo pruotu. Vyss dzeivē ir gaistūšs, puoreimūšs, nu gleznuos īlyktuo energeja sasagloboj myužeigi.

Karteņa: dagda.lv