Da 20. oktobra Lūznovys muižā apsaverama četru Latgolys muokslineicu apvīneibys V.I.V.A. gleznu izstuode “Ziedēšana”, kurā pyrmū reizi gleznuotuojis apsavīnoj tematiskā zīdu gleznu paruodē, viestej Lūznovys muižys sātys lopa.

Izstuodē “Ziedēšana” apsaveramuos zīdu tematikys gleznys viestej pasauļam par cylvāka i pučis zīdiešonys laika skaistumu, myužeigū zīda dzeivis ritmu nu kruošņa pumpura da sāklu i cereibai vālā rudiņa dyumokā, ka pavasarī zīdiešona izplauks nu jauna. Izstuode skateituojam ļaus rast atpyutu dobys kruosaineibā i ritmā, līkūt aizmierst par naatrysynuotuom kasdīnys nabyuteibom. Zīdi audaklā atkluoj kotrys muokslineicys pasauļa rodūšū uztveri – Agrys Ritiņys emocionaluo attureiba i lakoniskuo izteiksme, Vēsmys Ušpelis energetiski suleigī i syltī kruosu tūni, Vijis Stupānis drūsmeigu tūņu saspēlis kompozicejis, Ilzis Griezānis vīgluo kruosu sinteze.

Vysys gleznuotuojis ir nu Latgolys: Vēsma dzeivoj Maltys pogosta Garkolnūs i rodūšū spāku sevī apsazynuojuse jau vydsškolys laikā, partū ari studējuse gleznuošonu Latvejis Muokslys akademejis Latgolys filialē (LMA LF) i sajāmuse muokslys bakalaura gradu, itūšaļt kūpā ar veiru Aivaru aktivai dorbojās pūdnīku darbneicā “Malny Wylky”. Ilze kasdīnā voda Latgolys muokslys i omotnīceibys centra dorbu Leivuonā, ari LMA LF sajāmuse bakalaura gradu, nūpītnai gleznuošonai dasavārsuse nu 2006. goda. Vija dzeivoj Preiļu nūvodā Kasterā i audzynoj pīcus dālus, atrūnūt laiku ari gleznuošonai, kū jei ir vuicejusēs LMA LF, ir muokslys bakalaurs. Agrys rodūšais ceļš ir ilgstūšs i cīši saisteits ar juos kai pedagoga dorbu nu 1997. goda, ari jei studējuse LMA LF i vāluok sajāmuse ari magistra gradu muokslā LMA.

Muokslineicu apvīneibys V.I.V.A. sadarbeiba aizasuokuse 2006. godā muokslys plenerūs, kab, kūpeigai gleznojūt, pasadaleitu pīredzē, puordzeivuojumūs, atsapyustu, smaltūs spāku i puorlīceibu par izvālātuo rodūšuo ceļa napīcīšameibu, partū ka tys, kū varam saukt par muokslu, ir atrads naatsagrīžamu izpausmi vysuos četruos personeibuos. Nu 2012. goda V.I.V.A. dorbi kotru godu apsaverami vairuokuos izstuodēs i Latgolā, i Reigā, kai ari uorpus Latvejis (Lītovā, Boltkrīvejā). Lūznovys muižā muokslineicys ar izstuodi gastej ūtrū reizi.

Karteņa: luznavasmuiza.lv