Itūmienes iudiņa turisma centra “Bāka” Rēzeknis nūvoda Gaigalovys pogostā sevkurs interesents ir aicynuots apsavērt muokslineicys Violys Annys Bīriņys keramikys i kanvu izstuodi, kū papyldynoj Stanislava Viļuma keramikys dorbi, informej Rēzeknis nūvoda sātys lopa.

Viola Anna Bīriņa pabeiguse Latvejis Kulturys akademeju, kur sajāmuse Muokslys magistra gradu kulturys teorejā. Keramika orūdizgleiteibu vuicejusēs pi Stanislava Viļuma. Ar muolu struodoj nu 2008. goda. Pīsadalejuse i kūpeiguos keramiku izstuodēs, i ari personalizstuodēs, par pīmāru, 2014. goda julī Latgolys muokslys i omotnīceibys centrā Leivuonā, kur beja apsaverama muokslineicys veiduotuo keramika i fotografejis iz kūka.

Traukus keramike veidoj tik ar rūkom, bez pūdnīku rypys. Sovūs dorbūs izmontoj trauka silueta i fakturys īpašeibys. Puorsvorā tī ir praktiski izmontuojami kasdīnys trauki (škeivi, bļūdys, papluotis, augļu trauki, servejamī golda trauki, čainīki, taseitis) naīrostūs formu i dizaina rysynuojumūs. Nu 2009. goda pagaidom palīkūši rūkrokstā ir īguojs kūka teksturys nūspīdums. Teik izmontuoti ari cyti dobys materialu nūspīdumi, mežgiņu roksti voi vīnkuoršai asketisks, gluds trauka vierss.

Muokslineica aizaraun ari ar fotografiešonu. Kab īmyužynuotī fotokadri dabuotu vēļ leluoku dzeiveigumu, tī teik drukavuoti iz kanvys audakla, kū parosti izmontoj gleznuotuoji. Vysupyrma karteņa teik izdrukavuota augstā foto kvalitatē iz kanvys auduma. Kod karteņu dastyprynoj pi speciali veiduota kūka apakšrama, tei palīk cīši leidzeiga gleznai, kluot vēļ sajamūt telpiskumu i emocionalu nūskaņu.

Izstuodi “Svēpētā keramika tuvplānā” “Bākā” var apsavērt da septembra vyda.

Karteņa: rezeknesnovads.lv