Svātkus svieteis Viļānu nūvods

Svātkus svieteis Viļānu nūvods

vilanu svatki FI20. augustā ar devizi “Viļānu novads zied” tiks svieteiti Viļānu nūvoda svātki. Kai informej nūvoda puorstuove Margarita Isajeva, svātku laikā pasuokumi i bārnim, i pīaugušajim nūtiks na tik Viļānūs, nu ari nūvoda pogostūs.

Viļānu nūvodpietnīceibys muzejā nu 10 da 15 stuņžu varēs apsavērt divejis izstuodis: muokslinīka Jura Jurjāna dorbu kolekceju “Mīlestības zīmē” i Ontona Salīša sīnys dekoru izstuodi “Latvju rakstu motīvi no šķeltām klūdziņām”. Vysim muzeja apmaklātuojim apsavieršonai tiks pīduovuota ari pamatekspoziceja “Viļānu novads gadsimtu griežos”, sovukuort bārnim tiks pīduovuotys interesantys nūdarbis rodūšajā darbneicā “Latviju rakstu zīmes”.

Strupļu parkā nu 10 stuņžu sevkurs varēs īsasaisteit vysaiduos spēlēs vysai saimei. 13.00 vosorys estradē suoksīs koncerts, kurā pīsadaleis gostu kolektivi nu Gruzejis, Krīvejis i Boltkrīvejis.

Dekšuoru estradē nu 10.00 vysi teik aicynuoti veiduot zīdu pakluoju. 15.00 tīpat koncerts, kurā pīsadaleis kolektivi nu Lagodehi (Gruzeja), Glubokoje (Boltkrīveja) i Šliselburgys (Krīveja).  16.00 Dekšuorēs postfolklorys grupys “Rikši” koncerts, sovukuort 17.00 tiks dūts starts draudzeibys velobraucīņam iz Laksteigolu solu Viļānūs.

Viļānu piļsātys bibliotekā nu 11 da 17.00 vysim interesentim teik pīduovuota kolekcionaris I. Mičulišys izstuode “Bitīt, tavu čaklumiņu…”.

Svātkūs naiztiks ari bez sporta aktivitašu. Bīdreiba “Volejbola attīstība Latgalē” sadarbeibā ar Viļānu nūvoda Sporta školu organizej Latgolys kausa turniru pludmalis volejbolā. Viļānu piļsātys stadionā nu 11.00 nūtiks ari Latvejis Mintauta Kalniņa kinologiskuos asociacejis regionaluo škirnis medeibu suņu izstuode.

12.00 Viļānu Sv. Erceņgeļa Mikeļa Rūmys katuoļu bazneicā suoksīs pateiceibys dīvkolpuojums – Sv. Mišs par Viļānu nūvodu i tuo dzeivuotuojim.

Nūvoda svātki nūsaslēgs ar kruošņu koncertu Laksteigolu salā. Uzastuos vītejī pošdarbeibys kolektivi i gosti nu Gruzejis, Krīvejis i Boltkrīvejis. Tiks sveikti konkursa “Skaista un sakopta vide Viļānu novadā” laureati i svineigi sagaideiti draudzeibys velobraucīņa dalinīki. Jau par tradiceju palykuse fotoizstuodis reikuošona svātku koncerta laikā. Itūgod apsavieršonai tiks pīduovuota izstuode “Viļāni 70.-80.gados”. 21.00 varēs izadoncuot balā ar grupu “Mākoņstūmēji”, sovukuort pušnaktī – diskotekā ar DJ Arni.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]