Kuorsovys nūvods svātkus svieteis nedelis garumā

Kuorsovys nūvods svātkus svieteis nedelis garumā

Tyvojās Kuorsovys nūvoda svātki, kurī itūgod puļcēs nūvodnīkus i gaideis gostus nu 20. da 28. augusta. Tei byus boguoteigi pīpiļdeita nedeļa, kuruos laikā byus vareiba apmeklēt kulturys pasuokumus, spākuotīs vysaiduos saceņseibuos i baudeit popularu muokslinīku uzastuošonu, viestej Kuorsovys nūvoda sātyslopa.

Nūvoda svātkus 20. augustā atkluos Kuorsovys nūvoda Jaunīšu dīna Mežavydūs. Itamā dīnā byus vareiba dorbuotīs vysaiduos meistardarbneicuos (nu 17.00), 20.00 jaunīši muzicēs, doncuos i ruodeis sovus talantus koncertā, kurā tiks sveikti Mežavydu pogosta pylngadnīki. Vokorā 22.00 bals kūpā ar grupu “Azars”, pušnaktī puorsteigums – putu bals.

Nedelis laikā byus vysaidys vareibys māruotīs spākim – 23. augustā Malnovā, Malnovys koledžys stadionā 10 stuņdēs nūtiks Latvejis ZA regiona jaunīšu futbola čempionats U-12. 16.00 Kuorsovā, pludmalis volejbola laukumā, saceņseibys. 24. augustā Malnovys koledžys stadionā 16.00 minifutbola saceņseibys.

26. augustā, īsastuojūt tymsai, 21.00 Kuorsovys tenisa kortūs sportistus puļcēs Nakts saceņseibys – strītbols, ghetto florbols i īlu futbols. Skateituojus izklaidēs deju studeja nu Rēzeknis “Stoptime”.

Nūvoda svātku kulminacejis dīna, 27. augustā, īsasuoks ar Omotnīku tierdzeņu, kurā nu 11 stuņžu varēs īsaguoduot sātys ražuotuoju darynuojumus, jaunuokī svātku dalinīki nu sirds varēs izaprīcuot pīpyušamajā atrakceju parkā, kurs dorbuosīs da 16.00.

13.00 īsaskanēs Bebeišu svātki, kurūs tiks sveikti jaunuokī Kuorsovys nūvoda dzeivuotuoji. Saguojušūs prīcynuos suņu dreizuma i veikleibys paraugdemonstriejumi, byus vareiba izavyzynuot ar poniju i nu 15.00 byus daeimamys atrakcejis jaunuokajim bārnim.

15.00 Mežavydu pogosta ļauds kaminzalā “Pakavi” ar dzīsmem i stuostim prezentēs stuostu “Par Mežvidiem sauc manu Latgales ciemu..”.

Tyvojūtīs vokoram, 19.00 “Krosta” estradē varēs baudeit plašu koncertprogramu, kurā uzastuos Mežavydu pošdarbnīki, tiks gūdynuoti sakūptuokūs sātu saiminīki. Ar vuocu muzykaluom skaņom prīcynuos Dūbelis vuocu bīdreibys ansamblis “Die Lustigen”.

Vokorā iz ļusteigom dejom aicynuos šlagermuzykys aptaujis dalinīki grupa “Tērvete”, naktī ar energejis luodeņa devu uzastuos “Dzelzs vilks”, da pyrmūs gaiļu muzicēs “Marchello”.

28. augustā, kai īrosts svātku svātdīnē, reits suoksīs ar Svātū Mišu Mežavydu Skapulara Dīvmuotis Rūmys katuoļu bazneicā.

Iztureiguokī nūvoda svātku dalinīki itamā dīnā teik piecpušdīnē aicynuoti iz tenisa turniru Kuorsovys piļsātys kortūs, kur paraleli nūtiks šautreņu svīsšona, īlu vingruošona i saušona ar pneimatiskū blisi.

18.00 nūvoda svātkus nūslēgs koncerts “Taustiņinstrumentu trīsvienība” Malnovys Rūžukrūņa Dīvmuotis Rūmys katuoļu bazneicā. Tymā varganis sasatiks duetūs ar tausteņinstrumentim: varganis – Guna Kise, klavīris – Gunta Šmaukstele i akordeons – Aldis Kise. Vysa emoceju gamma izskanēs latvīšu, krīvu, vuocu, fraņču i Argentinys komponistu muzykā.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]