Zineibu dīnā iz pasuokumu aicynoj Latgolys Kulturviesturis muzejs

Zineibu dīnā iz pasuokumu aicynoj Latgolys Kulturviesturis muzejs

1. septembrī nu 10.00 da 16.00 Latgolys Kulturviesturis muzejā (LKM), Rēzeknē, nūtiks Zineibu dīnai veļteits pasuokums “Senā skola muzejā”, informej LKM muzejpedagoge Inese Ločmele-Jansone.

Jaunuo vuiceibu goda suokys ir nūzeimeigs laika atskaitis punkts ari muzejā. Jau sastū godu nūtiks pasuokums “Senā skola muzejā”, kab  školānim kūpā ar saimi byutu vareiba svieteit svātkus i reizē izzynuot viesturi.  Pyrma 100 godu īvāruojamuokais Latgolys rūkroksta literaturys puorstuovs pīraksteja kalenderi “Myužeygays kalinders”, kur kotrai goda dīnai dūtys kalendera zinis, praktiski padūmi zemnīkim, izsaceiti aforismi. Taišni Andryva Jūrdža rodūšuo darbeiba īdvasmuojuse svieteit Zineibu dīnu muzejā.

Pasuokuma laikā varēs:

• izzynuot par īvāruojamuokuo Latgolys rūkroksta literaturys puorstuova Andryva Jūrdža dzeivisgaitom, juo pīraksteitū kalenderu “Myužeygays kalinders” (1916. g.) i puorškūrsteit školānu veiduotū “…laika kalinders 2011”!

• apsavērt 19. godu symta latgalīšu autoru, gruomotu puorraksteituoju rūkrokstu paraugus, vysaidys 20. godu symta vuiceibu gruomotys, līceibys, kartenis,

• paraudzeit gleitraksteišonu ar tiņti i spolvu,

• nūsabiļdēt pi 20. gs. 80. godu školānu formystārpim,

• pīsadaleit myusu dīnu rūkrokstu paraugu kolekcejis veiduošonā,

• izzynuot par muzeja izgleitojūšū programu i pasuokumu pīduovuojumu jaunajā vuiceibu godā,

• apsavērt treis autoru kolekceju izstuodi: Ludmila Merkulova – ZVANIŅI. Bruno Jugans – PILDSPALVAS. Olesja Ņukša – KABATAS KALENDĀRI.

Īīšona iz pasuokumu – bez moksys.

Karteņā: ilustrativs foto nu 20. gs. 1. pusis vuiceibu gruomotys (LKM kruojums) 

Print Friendly, PDF & Email