Ir divejis latgalīšu volūdys raksteibys: tai sauktuo Stroda ortografeja i “jaunuo”. Leluokuo atškireiba storp obejom ir divskaņa uo pīroksts – “vacajā” variantā tū roksta ō, nu jaunajā – uo. Tikū izdūta Pītera Stroda “Pareizraksteibas vōrdneica”. Teņs Bikovskis skaidroj, parkū izdeviejs nūsprīds publicēt “vacuos” ortografejis vuordneicu, taipat vaicoj, kai obeju pušu nasaskanis ītekmej latgalīšu volūdys atteisteibu.

Kod medejūs ziņuoja par Leivuona nūvoda i dzeivuotuoju nasaskaņom par īsnāgumu raksteišonu latgalīšu volūdā, Alīna Gendele, Latgolys planavuošonys regiona Atteisteibys padūmis prīšksādātuoja, sūleja, ka vaicuojums tiks puorrunuots ar pošvaļdeibu vadeituojim. Eisā sarunā teik vaicuots, kaidi ir pīzynumi, taipat vaicuojumi par tū, kai nūteik Latgolys Specialuos ekonomiskuos zonys izveide, kai ari par gataveibu Latvejis symtgadis svineibom, kas Latgolā suoksīs jau 2017. godā. Vaicuojumi par symtgadis planavuošonu teik aizdūti ari Jolantai Buorītei, Symtgadis biroja Regionalūs i navaļstiskūs projektu vadeituojai.

Tikom Vuordineicā Valentins Lukaševičs i Arņs Slobožanins runoj par kačim.