Izdevnīceibā “Zvaigzne ABC” izdūts Viļa Selecka viesturiskais romans “Ardievas mežam”, kas viestej par nūtikšonom Latgolā godūs piec Ūtruo pasauļa kara, informej izdevnīceibys sātyslopa.

Laiks, kurā viesturis vieji sasagrīze vyrpulī, – godi, kad sasaškēle latvīšu saimis, kod sevkurs raudzeja paredzēt nuokūtni i dorbuotīs saskaņā ar sovim prīkšstotim par tū pat tod, ka tys nūzeimuoja stuotīs preteimā mīseigam tāvam voi bruoļam. Laikmatu grīži, kod zynomuos vierteibys i patīseibys ruodejuos pagaisynuojušys nūzeimi, kod škeļūt i uordūt guoja jaunuo pasauļa kuorteiba. Romanā “Ardievas mežam” apraksteitys nūtikšonys attuolā Latgolys pogostā skorbajūs godūs piec Ūtruo pasauļa kara, kod Latvejis teritorejā vairuokus godus nūtyka nažieleigs pylsūņu kars.

Pi Kazimira Rancāna smogi īvainuots īsarūn dāls Donats, kurū saime beja skaitejuse par pagaisušu. Mežabruoli jū sauc par Zibini. Kaidā kaujā nu Donata rūkys krits vītejais čekys prīšknīks. Piec dažu nedeļu Kazimira sātā īīt Krīvejā aizkleidušuo bruoļa dāls, čekys kapteiņs Arslans Zatulivitovs. Jis ite nūsyuteits, kab apspīstu partizanus i struopātu jūs komanderi Zibini. Suocās nūtikšonys, kas trokā vyrpulī īraun zemnīkus, školuotuojus, školānus. Kotram ir sovi mierki, sova izpratne par gūdu i pīnuokumu. Viermoj kaisleibys, plaukst dedzeiga mīlesteiba, nu leist ari asnis i daudzim iz myužu juoatstuoj dzymtuo sāta.

Viļs Seleckis (1950) ir latvīšu izgleiteibys darbinīks, rakstnīks i publicists. Apbolvuots ar III škirys Treju Zvaigžņu ordini. Daudzu gruomotu, tymā skaitā detektivromana “Sārta asins baltā sniegā”, autors.