Septembra suokuos iz nūsaklauseišonu dzīdūšus bārnus i jaunīšus aicynoj Rēzeknis nūvoda vokaluo studeja “Skonai”, informej vokaluos studejis muokslinīciskuo vadeituoja Guntra Kuzmina.

Nūsaklauseišonys nūtiks Rēzeknis nūvoda pošvaļdeibys aktu zalā (Atbreivuošonys alejā 95, Rēzeknē). 12-15 godu vaci jaunīši (videjuo grupa) teik aicynuoti 9. septembrī 16.00, vacuokuo grupa (16-25 godi) – 9. septembrī 18.00, nu poši mozuokī (4-6 godi) teik gaideiti 10. septembrī 11 stuņdēs.

“Skonai” sovys muzykaluos gaitys suokuse 2013. godā muokslinīciskuos vadeituojis Guntrys Kuzminys i kusteibu i deju pasnīdzieja Edgara Juknys vadeibā. Pa itū laiku pīdzeivuotys daudzys leluokys i mozuokys uzastuošonys, sovs originalizvadums, lobdareibys koncerti, plyukti lauri vaļsts vokalūs ansambļu konkursūs, dzīduošona kūpā ar Latvejā popularim muzikim (grupa “Elektrofolk”, L. Reiniks, U. Marhilevičs, N. Rutulis, A. Stafecka i cyti) īraksteitys sovys dzīsmis, videoklipi i sajimtys divejis Latgalīšu kulturys goda bolvys “Boņuks”.

Ansambļa repertuarā ir tautysdzīsmis i latgalīšu originaldzīsmis, kai ari uorzemu komponistu dzīsmis. Jaunajā sezonā kolektivam paradzāti dažaidi koncerti, muzykali projekti, vokaluos i deju meistarklasis, koncertprogramys ar Latvejā zynomim muzikim, sadarbeiba ar cytim vokalajim ansamblim, kai ari dzīduošona i individuali, i duetūs. Juodasoka, ka Rēzeknis nūvoda vokaluos studejis “Skonai” solisti plyukuši laurus –  Grand Prix – i Latvejis, i storptautyskūs vokaluos muzykys konkursūs.

Naizsokami tyva ansambļa dalinīkim ir goreiguo muzyka, partū lela daļa koncertu nūteik ari bazneicuos.

Bārni i jaunīši teik aicynuoti dasasaceit i palikt par eistynu “Skonai” dalinīku, i sekuot jūs moto – ka dorbu dori ar lelu mīlesteibu, tys dabeigi puortūp sirdslītā!

Info: skonai@inbox.lv, mob. 28617836