18. septembrī Bieržgalī nūtiks Ontona Rupaiņa 110. dzimšonys dīnai veļteits pasuokums, viestej Rēzeknis nūvoda sātyslopa.

“Jys nu Bēržgaļa Pūriskim nōk, un kai kastaņs jam vēsture šķeļās…” – pasuokums ir veļtejums rakstnīka Ontona Rupaiņa 110. dzimšonys dīnai i literaturzynuotneicys Paulīnis Zalānis 85 godu jubilejam.

Jubileja nūtikšonys suoksīs 18. septembrī 11.00 ar dīvkolpuojumu Bieržgaļa Svātuos Annys Rūmys katuoļu draudzis bazneicā, piec Miša paradzāta svineiga šaļts i zīdu nūlikšona pi Ontona Rupaiņa pīminekļa Bieržgaļa kopsātā, sovukuort 14.00 Bieržgaļa kulturys nomā nūtiks pīminis pasuokums, kura laikā dzejneica Anna Rancāne īpazeistynuos ar Ontona Rupaiņa dorbu nūzeimi, filologejis doktore Olga Senkāne runuos par cylvāku i tautys atveiduojumu Rupaiņa romanā “Tauta grib dzeivōt”, sovukuort profesore, filologejis doktore Ilga Šuplinska stuosteis par jaunu datorspēli “Īsapazeisim”, kurā Ontons Rupainis ir vīns nu personažu.

Rakstnīka jubileja pasuokumus reikoj Bieržgaļa pogosta puorvaļde i Ontona Rupaiņa muzejs.

Karteņā: Ontona Rupaiņa pīmineklis Bieržgaļa kopūs