Latgolys muokslinīki aicynuoti pīsadaleit rudiņa izstuodē

Latgolys muokslinīki aicynuoti pīsadaleit rudiņa izstuodē

Latgolys Kulturviesturis muzejs (LKM) i Latgolys muokslinīku kūpa aicynoj Latgolys profesionalūs, aktivi struodojūšūs i studejūšūs jaunūs muokslinīkus pīsadaleit tradicionalajā “Rudens 2016” muokslys dorbu izstuodē, kura itūgod tykuse pi konkretiziejuma, apakšnūsaukuma “Oga. Ūga”, informej muzeja puorstuovis.

2015. godā, kod kasgadejuo Latgolys muokslinīku dorbu rudiņa izstuode Latgolys Kulturviesturis muzejā prīcynuoja muokslys cīneituojus, paraleli dorbu apsavieršonai muzeja apmaklātuoji varēja pīsadaleit jau nuokušuos – 2016. goda izstuodis radeišonā.

Kab tradicionalū izstuodis ekspoziceju iz prīšku veiduotu sovpateiguoku, izstuodis dorbu atlasis komiseja īsaisteja apmaklātuojus nuokušuos izstuodis radeišonā, aicynojūt minēt vālamū izstuodis temu. Izviertejūt muokslys cīneituoju pīduovuotūs variantus, pījmts lāmums, ka 2016. goda rudiņa izstuodis tema byus “Oga. Ūga”.

Ūga ir suleigs daudzsāklu auglis, i boguotūs rudiņūs ūgys nu meža ūguotuoji nas sātā skalinem. Ūga ir ari granatuobeļs, ar kū čyuska kārdynoja Īvu i vāluok ari Odumu, i nūteik nanūvieršamais – cylvāki teik padzeiti nu raja, kab godu tyukstūšom vaicuotu patīseibu i eistynū ceļu. Ūgys ir aplīcynuojums rudiņa pylnbrīdam i rodūšuma pylnasneibai… Ūga ir breineigais kirbs, kam rodūšī cylvāki vysod sovūs dorbūs veļtejuši eipašu viereibu. Ūgys ir kotra muokslys viesturis perioda klusuos dobys naatjemama sastuovdaļa, vysleidza, voi tī ir Bosha, Karavadžo voi kaida cyta muokslys titana rodūšuos variešonys aplīcynuojums.

Saturiski boguotais i ītylpeigais veikala nūsaukums “Ūga” Preiļūs jau ilgu laiku prīcynoj Latgolys gostus ar duosnuom veļtem, kas radeitys Latgolā, dūd vareibu īpazeit latgalīšu volūdu i kulturu kasdīnā.

Dorbu īsnīgšona rudiņa izstuodei “Oga. Ūga” Latgolys Kulturviesturis muzejā (Atbreivuošonys alejā 102, Rēzeknē) da 12. novembra muzeja dorba laikā (t. 64622464 voi 29175532 – Inese Dundure, LKM muokslys nūdalis vadeituoja).

Īsnīgtūs muokslys dorbus eksponiešonai izviertēs komiseja. Tradicionali piec izstuodis, pasasokūt Rēzeknis piļsātys dūmis atbolstam, vairuokus komisejis īsaceitūs dorbus īpierks muzeja kruojumā, kas kotru godu papyldynoj myusu dīnu Latgolys muokslys kolekceju. Latgolys regiona muokslinīku dorbu rudiņa izstuodis “Oga. Ūga” atkluošona Rēzeknē ir planavuota 17. novembrī 15.00.

Foto: Elga Paura. “Vārtiņi”. 2015, papeirs, akvareļs 50×72 cm

Print Friendly, PDF & Email

Nūtikšonu kalendars

Mar
24
Pīk
15:00 Osvalda Zvejsalnieka pīmiņai veļ... @ Leivuona stykla i amatnīceibys centrs
Osvalda Zvejsalnieka pīmiņai veļ... @ Leivuona stykla i amatnīceibys centrs
Mar 24 @ 15:00 – 17:00
Leidz 13. apreļam Leivuona stykla i amatnīceibys centra izstuožu zālē apsaverama Osvalda Zvejsalnieka (1944-2022) gleznīceibys izstuode “Māja pie Daugavas”, informej centra puorstuove Kristīne Lipkova. 24. martā 15.00 stuņdēs paradzāta ari muokslinīka pīmiņai veļteita sasatikšona. Marts[...]
16:00 Latgolys grafikys simpozeja izst... @ Daugovpiļs Marka Rotko muokslys centrs
Latgolys grafikys simpozeja izst... @ Daugovpiļs Marka Rotko muokslys centrs
Mar 24 @ 16:00 – 17:30
Pīktdiņ, 24. martā, 16.00 stuņdēs Daugovpiļs Marka Rotko muokslys centrā piec div nedeļu intensiva dorba studejuos tiks atkluota 11. Storptautyskuo Latgolys grafikys simpozeja nūslāguma izstuode i sveikti tuo dalinīki. 11. Storptautyskais Latgolys grafikys simpozejs nūteik[...]