Pīktdiņ, 30. septembrī 16.00 Rēzeknis Centralajā bibliotekā (3. stuovā) nūtiks gruomotys “Pyura skreine” prezentaceja i literatu kūpys “Latgales ūdensroze” dalinīku skaitejumi, informej bibliotekys direktoris vītneica Ruta Suseja.

Gruomota “Pyura skreine” ir jau ūtrais literatu kūpys “Latgales ūdensroze” kūpkruojums. Pyrmais kūpkruojums ar nūsaukumu “Rositten” izguoja 2015. godā, i tys beja veļteits Rēzeknis piļsātys 730 godu jubilejam.

Kūpkruojumā “Pyura skreine” apkūpuoti literatu kūpys “Latgales ūdensroze” vīnpadsmit dalinīku dzejis i prozys dorbi latgalīšu volūdā. Ituo kruojuma autori: Līveja Liepdruviete, Imants Gailis, Maruta Avramčenko, Betija Berga, Aija Zuja, Elvira Pinka, Daiņs Krievāns, Kristīne Belinska, Arvīds Gļauda, Baiba Kauliņa i Iveta Dimzule. Gruomotys sastateituoja ir Aija Zuja, maketu veiduojuse Solveiga Sarkane i vuoka dizainu – Igors Madžulis. Kruojuma izdūšonu atbaļstejuse bīdreiba “LR”.

Literatu kūpai ”Latgales ūdensroze” oktobrī byus div godi. Tei apvīnoj Rēzeknē, Rēzeknis, Viļānu i Cyblys nūvodā dzeivojūšūs literatus. Kūpys sastuovā ir i zynomi dzejnīki, kurī publiciejušīs vysaidūs kūpkruojumūs, izdavuši sovus, i ari literaturā samārā naseņ īguojuši dzejnīki.

Literati sasateik reizi mienesī: skaita sovus jaunuokūs dorbus, runoj par literaturu, izkūp i sleipej rodūšumu ar vysaidu vyngrynuojumu paleidzeibu. Kūpai ir sova himna ar nūsaukumu “Latgolas yudiņsrūze”, vuordu autors ir Imants Gailis, muzykys autors – Elmārs Orlovs. Himna ir īkļauta jaunajā kūpkruojumā “Pyura skreine”, tei tiks atskaņuota gruomotys prezentacejā bibliotekā.