Grupa “Dabasu Durovys” sovā 10. jubileja godā izdūd albumu “Pādys Runoj”. Itys ir grupys catūrtais studejis albums, tys viestej par cylvākim, sajiutom i klusuma volūdu, kas reizem pasoka vaira par vuordim.

Jaunais albums ir stuosts par ceļu un ari pādim, kas vyslobuok zyna par tū, kas ir pīdzeivuots. Itei tema vīnoj vysys albumā īkļautuos dzīsmis, kurūs nūslāgumā ir na beigys, nu suokys – dzīsme “Suokums”. “Pādys Runoj” ir ari par pošys grupys 10 godu ceļu, kas ļuovs atrast vītu Latvejis i eipaši Latgolys muzykā i ari atstuot sovus pādus tamā.

Zeimeigi grupys jubilejai, albumā īkļautys 10 dzīsmis. Kai soka “Dabasu Durovys” liders Arņs Slobožanins, dzīsmis itūreiz radeitys nadaudz cytaiž kai ogruok – lānuok, nu kruosainuok, partū ka tūs radeišonā īsasaistejuši vysi grupys bīdri.

Jau ogruok klauseituoju viertiejumam nūdūtys taidys dzīsmis kai “Šūpuļdziesma”, “Pādys”, “Suokums” i ari dzīsme “Augstumā”, kas radeita ar Raiņa vuordim. Jaunuo albuma dzīsmem tekstus radejuši Arņs Slobožanins i latgalīšu dzejnīks Valentins Lukaševičs. Dzīšmu muzykys autori ir grupys dalinīki Arņs Slobožanins, Egils Kulmanis, Romans Sladzis, Aleksandrs Tamans, Valdis Rundzāns.

Albums īraksteits puorsvorā “Custom Studio” Daugovpilī. Izmontuotys ari grupys dalinīku sātys studejis i īrokstu studeja “Bozova” Kuorsovys nūvodā. Īrokstus producējuši poši grupys dalinīki.

Albums elektroniski daīmams Spotify, Deezer, iTunes i cytūs muzykys straumiešonys servisūs, kai ari dreizumā CD formatā muzykys īrokstu veikalūs “Randoms” i “Upe”, veikalā “oMarta” i cytur Latvejā.

Albuma “Pādys Runoj” prezentacejis koncerts nūtiks 4. novembrī klubā “Artilērijas Pagrabi” Daugovpilī.

Pyrms albuma prezentacejis grupa klauseituojim pīduovoj video klipu dzīsmei “Suokums”, ar kuru nūsaslēgs albums.