Padūtys Nikodema Rancāna bolvys izcyluokajim Latgolys pedagogim
Gūdynojūt goreidznīka, pedagoga, sabīdryskuo darbinīka Nikodema Rancāna pīmiņu, Školuotuoju dīnys prīškvokorā, 25. septembrī, Ludzys Tautys nomā Latgalīšu Kulturys bīdreiba (LKB) sadarbeibā ar Rēzeknis Tehnoloģiju akademeju (RTA) reikuoja ūtruo N. Rancāna konkursa izcyluokajim Latgolys pedagogim nūslāguma pasuokumu.
Konkursa pamatideja – gūdynuot lobuokūs Latgolys regiona školuotuojus, padūdūt jīm simbolisku, eipaši itam konkursam izgataveitu bolvu – sudobra pokovsaktu, kū izkaļs meistars Rihards Ciblis nu Rēzeknis nūvoda Maltys pogosta. Bolvys mierkis – ceļt školuotuoja profesejis prestižu, mudynuot jaunū paaudzi ryupeigi puordūmuot ari sovys profesejis izvieli par lobu školuotuoja profesejai. Itūgod konkursam tyka dasaceiti 16 pretendenti nu Rēzeknis, Preiļu, Dagdys, Baļtinovys, Ludzys, Kuorsovys, Rībeņu un Viļānu nūvodu, puorstuovātys beja 12 vyspuorizgleitojūšuos un profesionaluos īvierzis školys, kai ari divejis augstuokuos izgleiteibys īstuodis. Izcyluokūs pedagogus var dasaceit četruos nominacejuos, pamatojūt jūs profesionalū snāgumu un sasnāgumus pādejuo vuiceibu godu laikā.
Jau ūtrū godu konkureņcis nav nominacejā “Par spylgtuokū debeju školā”, kas laikam gon līcynoj par jaunūs pedagogu tryukumu Latgolys školuos. Itūgod bolva itamā nominacejā natyka daškierta, sovukuort prīcynoj fakts, ka leluokais dasacejumu skaits beja nominacejā “Par inovacejom izgleiteibys procesā”. Žūreja, kuruos sastuovā ir i LKB, i RTA, i Latgolys pašvaļdeibu puorstuovi, izsprīde daškiert itamā nominacejā pat četrys bolvys: Dagdys vydsškolys biologejis školuotuojai, mozpulku vadeituojai Annai Krilovai, Viļānu vydsškolys latvīšu volūdys i literaturys školuotuojai Ilgai Kroičai, Ezernīku vydsškolys muojtureibys i socialūs zineibu školuotuojai Diānai Kiseļovai i Rībeņu vydsškolys latvīšu volūdys i literaturys školuotuojai Diānai Bravackai.
Nominacejā “Par myusdīneigu i rodūšu pīeju školānu dorbaudzynuošonai i omotu apvuiceibai” par N. Rancāna bolvys sajiemiejim nūsaukti interešu izgleiteibys školuotuoji: Malnovys koledžys deju kolektivu vadeituoja Agnese Medne i Ludzys Muzikys pamatškolys školuotuojs Arņs Krancāns.
Sovukuort nominacejā “Par īguļdejumu i sasnāgumim latgalīšu volūdys, kulturviesturis i nūvodu vuiceibys īvīšonā un īdzeivynuošonā školys/augstuokuos izgleiteibys īstuodis vuiceibu/ studeju vidē” bolvu sajēme Baļtinovys vydsškolys nūvodvuiceibys i viesturis školuotuoja Inta Ludborža i Nautrānu vydsškolys muzikys školuotuoja Anna Garanča.
Jau ūtrū godu eipašys bolvys izcyluokajim nominantim snādz ari laikroksts “Izglītība un Kultūra”.
Latgalīšu literaturys, volūdys un kulturviesturis asociaceja uorpus konkursa specbolvai “Par Latgolys kulturmontuojuma saglobuošonu un īdzeivynuošonu originalūs projektūs, kai ari školu un augstškolu dorbā, nūvodvuiceibys idejis aizsuokšonā un realizeišonā” itūgod izvierzeja Rēzeknis Tehnologeju akademejis profesori i LKB vaļdis prīšksādātuojis vītneicu Ilgu Šuplinsku. Itū eipašū bolvu Ilgai Šuplinskai padeve LU profesore Lideja Leikuma, kura Ilgu raksturuoja kai latgaliskūs iniciativu Perpetuum mobile, partū ka juos realizātūs projektu skaits jau niu īsasnādz trejūs myužūs. Juodasoka, ka Ilga ir ari ituo konkursa iniciatore.
Svareigi, ka pasuokumā bolvu padevieji beja nūvodu pošvaļdeibu vadeituoji, īvāruojami Latgolys nūvoda cylvāki, Kulturys ministrejis puorstuovi, taidā veidā aplīcynojūt sovu cīneibu pedagoga dorbam. Vysi konkursa pretendenti sajēme na tik RTA izdūtuos gruomotys, nu ari Ontona Rupaiņa trilogeju “Māra mostas”, kū izdavuse Latgolys Kulturys centra izdevnīceiba rakstnīka jubileja godā. Veseleibu školuotuojim paleidzēs uzturēt mads nu Bišu muižys Kaunatys pogostā. Latgaliskuo humora dzierksti paleidzēja uzturēt breineigī i koloritī pasuokuma vadeituoji – Nautrānu vydsškolys direktoris Anitys Ludbuoržys (jei ir ari paguojušuo goda N. Rancāna bolvys laureate) i juos audziekņa Valtera Duplinska — babenis i unuka saspēlis. Laureatus ar kruošnim zīdim sveice kolegi, pošvaļdeibu puorstuovi, draugi, tyvinīki, tai aplīcynojūt ituo nūtykuma svareigumu, partū ka taida bolva deļ Latgolys pedagogu ir vīneiguo.
Pasuokumu kuplynuoja Ludzys Tautys noma pošdarbeibys kolektivi, jauktais kors “Austrumstīga” (dirigentis Lolita Greitāne i Evita Podoleca), kai ari dzīdūšuo Tihovsku saime.
Nikodema Rancāna bolvys padūšonu finansiali atbaļsteja Kulturys ministreja, Ludzys, Preiļu, Aglyunys, Viļānu, Kuorsovys i Rēzeknis nūvods.
Pasuokuma nūslāgumā interesenti varēja īsapazeit ar divejim jaunim latgaliskū kulturu popularizejūšim produktim: izgleitojūšū datorspēli “Īsapazeisim/ Iepazīsimies” i bilingvalu izgleitojūšu i izzinis kinu “Viļakas ticiejumi”, kurī radeiti RTA.
Teksts: Anna Rancāne
Kartenis: Māris Justs
