Vuorkovys nūvodā apsaverama Vonogu bazneicai veļteita izstuode
Vonogu biblioteka aicynoj apsavērt izstuodi “Vanagu pērle”, kas veļteita Vonogu bazneicys 80 godu jubilejam i pravesta Leona Garškys 110. godadīnai. Izstuodē da 28. oktobra byus apsaverami dokumenti i viesturiskys kartenis par bazneicys ceļtnīceibu, svātkim i Leona Garškys dzeivi.
Itūšaļt radzamuo myura bazneica ir izcalta 1936. godā, apjumūt vacū bazneicu. Bazneicys ceļtnīceibys dorbus vadejs pravests Leons Garška. 1934. goda 14. oktobrī Leivuona dekans Stanislavs Vaikulis īsvieteja bazneicys pamatus, nu 1936. goda 11. oktobrī pravesta Leona Garškys darbeibys laikā veiskups Jezups Rancāns dīvnomu konsekrēja Svātuos Annys gūdam.
