25. oktobrī 15.00 Latgolys Centraluos bibliotekys pasuokumu telpā (Reigys īlā 22a, 3. stuovā) nūtiks Josifa Ročko gruomotys “Евреи в Латгалии. Исторические очерки” 2. siejuma prezentaceja, informej bibliotekys puorstuove Inga Gedžūne. Gruomota izdūta ar Daugovpiļs dūmis atbolstu i ir veļteita piļsātys aizvadeitajam 740 godu jubilejam.

Viesturnīka, nūvodpietnīka, gida, Daugovpiļs ebreju kūpīnys muzeja “Daugavpils un Latgales ebreji” dybynuotuoja i vadeituoja, vairuoku gruomotu i publikaceju autora Josifa Ročko jaunuokuo gruomota “Евреи в Латгалии” ir kuortejais vierteigais papyldynuojums Daugovpiļs ebreju kūpīnys izdavumu serejā par Daugovpiļs i Latgolys ebrejim i holokausta tragedeju. Tei ir radeita kai organisks, koč i na tiulenejs turpynuojums pyrmajam siejumam, kurs tyka izdūts 2010. godā.

Ūtrajā siejumā teik stuosteits par ceļojūšajim ebreju tierguotuojim Latgolā eisai pyrma Ūtruo pasauļa kara, atsasaucūt iz taidu olūtu kai latvīšu i latgalīšu literatura, gazetu materiali, specialuo zynuotniskuo literatura i autora savuoktuos mutvuordu viesturis līceibys. Četri apceriejumi veļteiti ebreju tautys leluokajai katastrofai – holokaustam. Tymūs autors apsaver jaunys viesturiskys līceibys nu oculīcinīku i Daugovpiļs geto bejušūs giustekņu atminis, kai ari analizej divejis holokaustam veļteitys gruomotys, kas izguojušys Kanadā i Izraelā i kurūs autori ir Daugovpiļs geto bejušī giustekni. Izdavums turpynojās ar stuostu par ebreju biegļu liktinim i Daugovpiļs ebrejim pieckara godūs, koncentrejūt iz ebreju iņteligeņci – Daugovpiļs Universitatis i Reigys Tehniskuos universitatis Daugovpiļs filialis pasnīdziejim, kurūs vydā ir vairuoki profesori i zynuotņu doktori ar vierteigu īguļdejumu piļsātys intelektualuos dzeivis i zynuotnis atteisteibā.

Sasatikšonys laikā Latgolys Centralajā bibliotekā Josifs Ročko stuosteis par gruomotys veiduošonu, pīduovuos īskotu tuos saturā, kai ari atbiļdēs iz kluotyn asūšūs vaicuojumim.

Karteņa: daugavpils.lv