Preiļu kulturys noma lelajā zalā da 11. novembra apsaverama muokslineicys, komponista Juoņa Ivanova mozmeitys Diānys Īvis gleznu izstuode “Latgales ainavas”, viestej Preiļu nūvoda sātyslopa.

Izstuode ir veļteita komponista Juoņa Ivanova 110 godu jubilejam. Gatavejūtīs tam, muokslineica apceļuojuse sova vactāva dzimtini Latgolu –  ar skaistajim dobys skotim.

Muokslineica klausejusēs Juoņa Ivanova muzyku nu bierneibys, tei navarēja naītekmēt juos pasauļa redziejumu. Diāna Īve ari bīži gleznoj, klausūtīs Juoņa Ivanova muzyku. Tai jei pīroduse jau nu bierneibys, partū ka sātā vysod skanēja Juoņa Ivanova muzyka tāva pianista Igora Ivanova izpiļdejumā voi ari platēs.

Juoņa Ivanova muzykys pamatā beja Latgolys dobys i muzykys īspaids, kurū jis sajiems iz vysu myužu, pavodūt bierneibu Latgolā.

Diāna Īva (dz. Ivanova) ir profesionala muokslineica. Vuicejusēs Reigys dizaina i muokslys vydsškolā, Latvejis Muokslys akademejā sajāmuse magistra gradu tielnīceibā i gleznīceibā.