Rēzeknē nūtiks 9. storptautyskuo latgalistikys konfereņce
30. novembrī i 1. decembrī Rēzeknē nūtiks 9. storptautyskuo latgalistikys konfereņce, kas byus veļteita Fraņča Kempa 140 godu pīmiņai.
Latgalistikys konfereņcis da šuo jau bejušys: Sanktpīterburgā (Krīveja, 2008), Rēzeknē (Latveja, 2009), Greifsvaļdē (Vuoceja, 2010), Poznaņā (Pūleja, 2011), Reigā (Latveja, 2012), Ačynskā (Krīveja, 2013), Rēzeknē (Latveja, 2014), Viļņā (2015, Leitova). Turpynojūt tradiceju, 2016. godā konfereņce nūtiks Rēzeknē i byus veļteita Fraņča Kempa 140 godu jubilejis pīmiņai.
Konfereņcis temys:
– Latgolys kongresa symts godi, sabīdryskūs i kulturys darbinīku dūtais vaļstiskuma idejis dzymdynuošonā i kaldynuošonā;
– etniskuo, teritorialuo, nacionaluo i c. ideņtitatis, jūs paruodeišona pīrūbeža kulturā i volūdā;
– pīrūbeža kulturu sovstarpeiga īsadorbuošona: puorjimšonys, tipologiskys leidzeibys i atškireibys folklorā, literaturā, plašsazinis leidzekļu telpā, muzeju dorbā;
– IT i muzeja dorbs, humanitaruos jūmys moderniziešonys vareiba;
– latgalīšu volūda zam cytu pīrūbeža volūdu;
– latgalīšu volūdys, nūvoda vuiceibys metodologiskī aspekti.
Konfereņcis ītvorūs nūtiks ari literari muzykaluo nūtikšona “Andrejdīna”, kurei ir Rēzeknis Tehnologeju akademejis (īprīšk Rēzeknis Augstškolys) tradiceja. Pyrmū reizi Andrejdīna brauks gostūs iz Lūznovys muižu. Ituo goda Andrejdīnā byus raudzeišona sasatikt ar Fraņci Kempu i jam veļteituo romana “Aizlauztais spaits” raksteituojim Sandru Ūdri i Juoni Ryučānu, taipat byus kūpeiga īsavieršona DVD “Viļakys ticiejumi” i “Senī omoti Dagdā”. Tradicionali naiztikt ari bez literaturys i muzykys. Tekstus itūgod izdzeivuos Anna Rancāne, Raibīs, Betija Berga, Ineta Atpile-Jugane, Anita Mileika, Guntis Rasims, Līveja Liepdruviete, Inga Kaļva, Ligeja Purinaša, Māreite Krasnobaja, Meldra Gailāne, Māreite Slišāne, Leiga Čevere i gosti nu Pleskovys Vaļsts universitatis. Taipat muzicēs muokslinīku radūšuo apvīneiba “Rūnas”.
