Dzejnīks, rakstnīks, folklorists, nūvodpietnīks i muokslinīks Ontons Slišāns ir zīmys saulgrīžu bārns, dzims 28. decembrī, bet vuordadīnu svieteja 18. janvarī. Itys laiks Ontonam beja rodūšais laiks, kod jis sovu aktivū darbeibu veļteja Zīmeļlatgolai. Upeitis pamatškola sadarbeibā ar Namaterialuos kulturys montuojuma centru “Upīte” aicynoj sajust Ontona Slišāna goru, pīsadolūt rodūšūs dorbu konkursā.

Konkursa mierkis ir aplīcynuot pīdareibu i mīleisteibu sovam dzymtajam nūvodam i styprynuot latgaliskū kulturidentitati.

Konkursā aicynuoti pīsadaleit Viļakys, Baļtinovys, Ruguoju i Bolvu nūvoda školāni, kurim teik pīduovuoti div aizdavumi:

1. Rodūšais dorbs (eseja, miniatura i tt. dorbu var raksteit gon latvīšu litararajā, gon latgalīšu rokstu volūdā) “Asu lapnys, ka asu latgalīts”.

Viertiešona byus pa vacuma grupom:

1.–4. klase dorbu var īsnēgt rūkrokstā, dorba lelums 1 A4 formata lopa

5.–7. klase dorbu īsnādz datorrokstā, dorba lelums 2 A4 formata lopas

8.–12. klase dorbu īsnādz datorrokstā, dorba lelums 3 A4 formata lopas

2. Zeimiejumu konkurss “Ilustraceja munam mīļuokajam O. Slišāna dzejūļam”. Zeimiejumu formats A3 lopa, tehnika piec izvielis. Zeimiejumam juodalīk ilustrātais dzejūļs.

Viertiešona byus pa vacuma grupom: 3–5 godi; 6–8 godi; 9–12 godi; 13–15 godi; 16–19 godi.

Kotrys školāns var pīsadaleit vīnā voi obejūs konkursūs. Kotrys dalinīks var īsnēgt naīrūbežuotu skaitu sovu dorbu.