Kotram sovu sauvi laimis itymūs Zīmyssvātkūs

Kotram sovu sauvi laimis itymūs Zīmyssvātkūs

2016. goda beiguos Lūznovā, Rēzeknē, Preiļūs i Ludzā gaidomi Zīmyssvātku muzykaluos apvīneibys labdarības koncerti “Katram savu sauju laimes”.

Koncerta muzykaluo programa pīduovoj vīnkuoršeibu, sirsneibu, nadaudz ari naivumu i rūtaleibu, kas izgaismoj tymsūs zīmys vokorus. Jaunradē, izmontojūt latvīšu dzejis i prozys klasikys fragmentus, Latgolys komponisti sovuos muzykalajuos partituruos atguodynoj par mozūs kasdīnys lītu vierteibu. Zīmyssvātku muzykalajai apvīneibai itūgod ir izaveiduojuse skaneigi skaista sadarbeiba ar taidim Latgolys komponistim kai Solvita Ivanova, Tuoms Lipskis,  Guntra Kuzmina, Līva Blūma. Taipat ar sovom kompozicejom koncerta programu papyldynuos storptautyski zynomuos komponistis Lolitys Ritmanis skaņdorbi.

2009. godā Juoņa Ivanova Rēzeknis muzykys vydsškolā sasatyka muziku dūmubīdru grupa, kas pavysam najauši, vīnkuorši i bez tuolim mierkim izdūmuoja svieteit Zīmyssvātkus, izduovojūt Latgolys regiona klauseituojim muzyku. Tuos beja suokys muziku grupys, Zīmyssvātku muzykaluos apvīneibys radeišonai, kas par sovu tuoluokū mierki pastateja lobdareibys koncertu reikuošonu, tai atbolstūt Latgolā dzeivojūšūs bārnus i jaunīšus ar veseleibys gryuteibom. Itys mierkis nu jau ostoņus godus puļcej kūpā Zīmyssvātku muzykaluos apvīneibys dalinīkus. Ituos apvīneibys sastuovā vysi dalinīki ir i Juoņa Ivanova Rēzeknis muzykys vydsškolys, i Jezupa Vītuola Latvejis Muzykys akademejis asūšī i bejušī studenti – Ilze Grēvele (vokals), Laura Reksne (vokals), Iluta Igaune (flauta), Juoņs Igaunis (klarnete), Jana Kuzmenkova (klavīris), Mārcis Lipskis (basgitara), Jurs Laizāns (sytaminstrumenti).

Itūgod Zīmyssvātku muzykaluo apvīneiba ar koncerta klauseituoju atbolstu gryb paleidzēt Agnesei Vitanei (9 godi) i Anastasijai Burovai (4 godi). Obejis meitinis ir nu Rēzeknis. Agnese ir cīši dzeivisprīceiga, smaideiga i pozitiva. Dīvamžāļ Agnesei ir izstuodeita pamatdiagnoze Angelmana sindroms. Tei ir cīši rata genetiska saslimšona, kam rakstureiga gareiguo atpaliceiba, nav volūdys, traucāta seikuo motorika i leidzsvors, slykts mīgs i simptomatiskuo epilepseja. Vacuoki, raugūt integrēt bārnu sabīdreibā i uzlobojūt juos dzeivis kvalitati, īsaista Agnesi reitterapejā, kai ari regulari apmeklej baseinu, kas dūd pozitivus rezultatus. Dīvamžāļ itūšaļt slimeiba nav piļneibā uorstejama, nu kūpā mes varam paleidzēt Agnesei koč nadaudz atvīgluot ituos slimeibys radeituos sakys, kab meitine palyktu piec īspiejis patstuoveiguoka, cik nu tys īspiejams, i turpynuotu meiļuot dzeivi tikpat cīši i patīsi kai da šam.

Anastasijis diagnoze ir Antenatāls CNS būjuojums. Sasnādzūt 2,5 godu vacumu, meitine suoce spert pyrmūs sūļus. Kusteibys beja nastabilys i saspryngtys. Itūšaļt Anastasija vys vēļ narunoj, namuok izpiļdeit vīnkuoršus lyugumus, naspiej ilgi koncentrēt viereibu, ir problemys ar komunikaceju. Vysu itū laiku meitine ir veikuse rehabilitacejis, apmeklējuse logopedu, reitterapeju, fizioterapejis procedurys i cīši dorbuojusēs sātā, nu bārna atteisteiba vierzejuos iz prīšku cīši lānā tempā. Beidzūt uorsti Sanktpīterburgys neirologejis centrā ir davuši cereibys, ka Anastasija varātu izaveseļuot, nu, lai tys nūtyktu, proceduru kursam vajadzeigi leli finansiali leidzekli.

Lobdareibys koncerti nūtiks:

11. decembrī Lūznovys muižā 15.00

23. decembrī Rēzeknis teatra nomā “Joriks” 18.00 i Preiļu tierdznīceibys centrā “Ūga” 21.30

26. decembrī Ludzys tautys nomā 18.00

Īīšona koncertūs par zīduojumim.

Karteņa: Anita Austvika (momenti.lv)

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]