Andra Čudare naseņ atsagrīzuse nu Tadžikistanys, kur pavadeja treis mienešus, dzeivuoja Širinbeku saimē, kuope kolnūs, vuoce uorstnīceibys augus i fotografēja tūs gruomotai, gataveja aptīkā čajus, kai ari fiļmēja video par tradicionalajim iedīnim Pamirā. Tadžikistanys braucīņs ir navaļstiskuos organizacejis GLEN globaluos izgleiteibys apvuiceibys programys projekts, kurymā nūsadorboj ar kulturys montuojuma i medicinys prakšu saglobuošonu. Andra stuosta, ka tū saprotuse kai vareibu pagaist nu Latvejis i izdūmuot, kū dareit tuoļuok dzeivē.

Vuordineicā Arņs Slobožanins i Valentins Lukaševičs runoj par latgalīšu politiki i publicistu Fraņci Kempu, kuram 24. decembrī byus 140. pīminis dīna. Sprīž, kai mainejīs redzīņs par tū, ka Kemps bejs “slyktais” – pretinīks idejai par Latgolys apsavīnuošonu ar puorejim Latvejis nūvodim.

Izguojuse ari jauna gruomota par Fraņci Kempu “Aizlauztais spaits”. Gruomotu sarakstejuši Sandra Ūdre i Juoņs Ryučāns. Sandra skaidroj, parkū gruomota daudzim liks viļtīs.