Vēļ puors dīnu var dasaceit pretendentus bolvai “Boņuks 2016“
Da 11. janvara Latgolys viestnīceiba GORS gaida pretendentu dasacejumus Latgalīšu kulturys goda bolvai “Boņuks 2016”, kab svineigajā ceremonejā 26. februarī gūdynuotu padareitū i sasnāgumus latgalīšu kulturys dzeivē 2016. godā, informej Latgolys viestnīceibys GORS puorstuove Edeite Husare.
Kotru godu Latgalīšu kulturys goda bolvys padūšonys ceremoneja ir na tik apkūpuojums par īprīkšejā godā padareitū, nu ari sirsneiga latgalīšu kulturys aktivuokūs ļaužu, interesentu i atbaļsteituoju sasatikšona. 2017. goda 26. februarī Latgolys zalta – muola – Boņuki tiks padūti jau deveitū reizi. Ituo gods ceremoneja taisuos byut eipaši muzykala – ar sovu snāgumu prīcynuos “Tautumeitas”, “Dabasu Durovys”, Sovvaļnīks, “Rikši”, Guntra Kuzmina, folklorys kūpa “Upīte”, apvīneiba “Jubilāri” i cyti muokslinīki.
Latgalīšu kulturys goda bolvys “Boņuks” mierkis ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kultūrā pārnejuo goda grīzumā. 2016. goda bolvai pretendentu dasacejumi teik pījimta 18 nominacejuos, kas atsatīc iz sabīdryskūs aktivitašu, muzykys i literaturys laukim.
Aizpiļdeitys dasacejuma anketys bolvai “Boņuks 2016” elektroniskā formatā, pa postu voi aizpiļdeitys tīšsaistis dasacejuma veidā Latgolys viestnīceiba GORS gaideis da 2017. goda 11. janvara. Dasacejumus izvērtēs kompetenta žureja sovu sferu profesionaļu sastuovā. Kotru godu bolvai teik sajimts vaira par 100 dasacejumu. “Boņukam” izvierzeitūs nominantu vuordi byus zynomi februara suokuos.
Škārsteiklā anketys aizpiļdeit var: http://ej.uz/Bonuks2016. Kontakti sasazynuošonai i vaicuojumim: bonuks@rezekne.lv
Video īsavieršona bolvu padūšonys ceremonejā:
