Nu 26. janvara da 26. februara Reigā, Latvejis Fotografejis muzejā, apsaverama fotografis Ivetys Vaivodis izstuode “Zobens lilijas”, kas veļteita Latgolys kulturtelpai, viestej informaceja muzeja sātyslopā.

“Zobens lilijas” ir karteņu sereja, kas vizuali pietej Latgolys kulturtelpys montuojumu. Projekts ītver kartenis, kū 3 godu laikā ir veiduojuse vīna nu Latvejā lobuok zynomuom fotografem – Iveta Vaivode.

Latgolys regionam ir eipaša vīta Latvejis nacionaluos identitatis veiduošonā. Koč i Latgola ir daļa nu Latvejis, sovā ziņā tei veidoj nūškiertu zemi, kurā augsta religiozitate mejās ar boguotom tautys tradicejom. Latgalīšu volūda, katuolicisms i naatkuortojama, pat mežūneiga lauku ainova tī tykušajam svešinīkam ļaun pīredzēt magisku i reizē skorbu realitati. Projekta ītvorūs autoris sajimtuo pīredze tyka transformāta vizualā stuostejumā, kas līcynoj par ituos vītys cylvākim, vierteibom i pa drupeitei gaistūšom atmiņom.

Autore stuosta: “Asūt Latgolā, mani puorjam zaudiejuma, nu reizē mežūneigys prīcys izjiuta. Latgola maņ ir palykuse par metaforu pagaisynuotajai bierneibai. Radzūt ituos vītys tukšumu i paguojušūs laiku montuojuma truniešonu, es palīku par maņ zynomuos Latgolys pagaisšonys līcinīku. Tok tei nav tik pagaisuse paguotne, tys ir muns mieginuojums nūgiut vēļ pādejuos, mums tik zynomuos ainovys atbluozmis.”

Iveta Vaivode (1979) ir vīna nu zynomuokuom latvīšu fotografem. Sajāmuse magistra gradu Ālto Universitatē Helsinkūs. Juos fotografeju sereja “Klēpis” tykuse pi vairuoku storptautysku apbolvuojumu, kurūs vydā – CO Berlin Talents 2013, Burn Magazine stipendeja,  CDS Dokumentaluos fotografejis bolva, kai ari nominacejis pasauļa nūzeimeiguokajūs fotokonkursūs “Sony World Photography Awards” i “Leica Oscar Barnack Award 2014”. Nu 2008. goda Iveta ir bezpeļnis organizacejis ISSP (Storptautyskuo Vosorys fotografejis škola) vaļdis lūcekle i ir atbiļdeiga par ISSP Školys vuiceibu programu i atsevišku kursu pasnīgšonu.