Februarī Rēzeknē byus apsaverama Latgolys kruosu burveiba Semjona Antonova gleznuos

Februarī Rēzeknē byus apsaverama Latgolys kruosu burveiba Semjona Antonova gleznuos

Februarī Latgolys viestnīceibys GORS Muokslys galerejā byus izbaudama Latgolys kruosu dažaideiba i burveiba riezeknīša, gleznuotioja Semjona Antonova dorbūs, informej Latgolys viestnīceibys GORS Marketinga nūdalis vadeituoja Edeite Husare.

Antonovs ir puorlīcynuots ainavists, kurs, respektejūt realistiskuos muokslys pryncypus, godu desmitim smieļs īdvasmu Latgolys dobā. Ar izstuodi muokslinīks atzeimoj sovu septeņdasmytū dzimšonys dīnu, aicynojūt sevkuru interesentu iz sasatikšonu 18. februarī 14.00.

Semjona Antonova dorbūs rūtojās vysa kruosu palete – nu maigu pasteļtūņu niansātuos zīmys ainovuos voi vibrejūšā iudiņa viersmā da pylna kruoszīda rudiņa kūšajūs audaklūs. Koč i nūsaukumūs i sižetūs atpazeistam vīnu voi ūtru Latgolys pakolna leikni voi azara krosta lineju, dorbim pīmeit lela nūsaceiteibys dava, kas tūs padora vys interesantus i skotam pi tūs līk atsagrīzt vēļ i vēļ. Emocionali puorlīcynūšys sovā kompozicionalajā vīnkuoršeibā ir piļsātys ainovys, izstuodē eksponāti ari izjusti saimis lūcekļu portreti.

Semjons Antonovs (dz. 1947. g.) piec Rudzātu vydsškolys beigšonys vuicejīs Reigys Lītiškuos muokslys vydsškolys Rēzeknis filialē. Struoduojs par muokslinīku nūformātuoju Rēzeknis kulturys nomā, bejs scenografs teatra studejā “Joriks”, kur kotrai izruodei skotuviskajā nūsaceiteibā vaicuojs novatoriskus rysynuojumus. Regulari pīsadalejs kasgadejuos grupu izstuodēs Latgolys Kulturviesturis muzejā, nu 1992. goda sareikuojs ostonis personalizstuodis. Lelu skateituoju interesi muokslinīks baudejs personalizstuodēs Latgolys Kulturviesturis muzejā 2007. i 2012. godā.

Juo dorbi atsarūn Latgolys Kulturviesturis muzeja kolekcejā, privatkolekcejuos Latvejā, Igaunejā, Krīvejā i cytur, publicāti Pītera Zeilis gruomotā “Latgales glezniecība”.

Izstuode “Latgales krāsu burvība” Latgolys viestnīceibā GORS apsaverama nu 6. da 20. februara.

Print Friendly, PDF & Email

Komentari

Kalenders

Feb
29
Cat
all-day Evijis Styrnys gleznu izstuode “... @ Rēzeknis Centraluo biblioteka
Evijis Styrnys gleznu izstuode “... @ Rēzeknis Centraluo biblioteka
Feb 29 all-day
Mādz saceit, ka dzeive ir sapyns. Izstuodē ir vārojamys gleznys akvareļu tehnikā, kuru var skaiteit par eipaši pīmāruotu sapynu atspaitu radeišonai. Akvareļu kruosys ar sovu plyustūšū caurspeideigumu ļaun mums īsajust sapynu pasaulī, kur vysu dzeivūs[...]