Zynomi Latgalīšu kulturys goda bolvys „Boņuks 2016“ nominanti

Zynomi Latgalīšu kulturys goda bolvys „Boņuks 2016“ nominanti

Februara golā jau deveitū reizi tiks padūtys Latgalīšu kulturys goda bolvys “Boņuks”, deļtuo, tyvojūtīs “Boņuks 2016” ceremonejai, kuruos nūtikšona byus ituo goda 26. februarī Latgolys viestnīceibā GORS, nūskaidruoti bolvys pretendenti 17 nominacejuos sabīdreibys i kulturys, muzykys i literaturys sadaļuos. “Boņuks” ir vīneiguo bolva, kas eipaši izceļ i gūdynoj sasnāgumus latgalīšu kulturys dzeivē, verūtīs na tik Latgolys regionu, nu ari latgaliskuos aktivitatis cytur Latvejā i pasaulī. 

Latgalīšu kulturys goda bolvys “Boņuks” mierkis ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i svareiguokūs sasnāgumus latgalīšu kulturyā pārnejuo goda grīzumā. Itūgod pretendentu skaits beja rekordlels – bolvai tyka izvirzeiti 162 ļauds, nūtikšonys i aktivitatis, kūpejam dasacejuma anketu skaistam sasnādzūt 195 gobolus. Nu sajemtūs dasacejumu tyka izvārtāti pretendenti, kas atbylda bolvys nūlykumam. Itūšaļt teik paziņuoti bolvys pretendenti 17 nu vysu 18 nominaceju. Bolvys sajiemiejs nominacejā “Par myuža īguļdejumu latgalīšu kulturys atteisteibā” tiks paziņuots, kod ceremoneja īs tyvuok. Itūgod bolva natiks padūta nominacejā “Radejis hits“.

Latgalīšu kulturys goda bolvys “Boņuks 2016” nominanti ir (nominacejuos pīraksteiti alfabeta parādā):

Sabībdreiba i kultura:

Goda cylvāks kulturā

Edīte Husare (latgalīšu kulturys projektu vadeituoja)
Ilga Šuplinska (filologejis doktore, latgalīšu kulturvidis aktiviste)
Ilmārs Dreļs (horeografs, deju kūpys “Dziga” vadeituojs)
Pīters Ragaušs (latgalīts nu ASV, kinys “Likteņzeme” golvonais varūņs)
Viesturs Kairišs (režisors)

Goda nūtikšona

Juoņa Streiča 80 godu jubileja koncerts Latgolys viestnīceibā GORS
Latgolys dīna Latvejis Nacionalajā bibliotekā
Latvejis Radejis Latgolys multimedeju studejis atkluošona
Meilys aiļu i dzīšmu festivals “Upītes Uobeļduorzs”
Vidis, dejis, muzykys i gaismu izvadums ““Lūznavas atspulgā” jeb “MŪZdienas“”

Par latgalīšu volūdys populariziešonu

Animacejis kina “Vasals, Vinnej Pūk!”
Bankys “Citadele” mobiluo aplikaceja latgalīšu volūdā
Latgalīšu kulturys ziņu portals LaKuGa.lv
Latgalīšu rokstu volūdys pošvuiceibys materials “Vuicīs raksteit latgaliski!” (bīdreiba “Latgolys Studentu centrs”)
SIA “Lietišķā Latgale” radejis raidejumi “Pi myusim Latgolā”

Goda amatnīks/saiminīks

Audieja Annele Slišāne, projekts #100dečiLatvijai
“Latgolys šmakovka” dadzynuotovys saiminīks Juoņs Krivtežs
Preiļu tierdznīceibys centra “Ūga” saiminīki Ingūna i Aigars Zīmeli
Ražuotnis “Jersikas čipsi” saiminīks Artis Paeglis
Zemnīku saimisteibys “Zvejnieki” saiminīki Juoņs i Anna Macāni

Goda snāgums vizualajā muokslā

Diāna Īve. Gleznu izstuode “Latgales ainavas” Preiļūs
“Jāzepa Pīgožņa balvas Latvijas ainavu glezniecībā 2016” izstuode Preiļūs
Latgolys muokslinīku dorbu rudiņs izstuode “Oga.Ūga”
Muokslineica Daina Salmiņa

Goda snāgums skotivis muokslā

Deju kūpys “Dziga” 25 godu jubileja koncerts “Dzigas godu solis”
Juoņa Streiča 80 godu jubileja koncerts Latgolys viestnīceibā GORS
Latvejis Nacionaluo teatra izruode “Bišumāte un vilkacis”
Rēzeknis Tautys teatra izruode “Pupas”
Vidis, dejis, muzykys i gaismu izvadums ““Lūznavas atspulgā” jeb “MŪZdienas””

Goda snāgums audiovizualajā muokslā

Animacejis kina “Vasals, Vinnej Pūk!”
Dokumentaluo kina “Likteņzeme”
Eiskina “Gambits 1917”
Latvejis kods. Dokumentaluo kina “Runātāji”
Raidejumu cyklys “Sajūti Latgali”

Par latgalīšu kulturys populariziešonu Latvejā i pasaulī

Dokumentaluo kina  “Likteņzeme”
Facebook lopa “Latgaļu vyspasauļa gudreibu olūts”
Izgleitojūša datorspēle “Īsapazeisim/Iepazīsimies”
Latgolys regionaluo televizeja
Latgalīšu kulturys ziņu portals LaKuGa.lv
Romana “Klūgu mūks” tulkuojums lītaunīku volūdā

 

Muzyka:

Lobuokais snāgums pop/rock muzykā

“Dabasu Durovys” ar albumu “Pādys runoj”, videoklipu i koncertdarbeibu
Guntra Kuzmina ar dzīsmi “Buorstuos”
“Piparmētra” ar dzīsmi “Elpoj”, videoklipu i koncertdarbeibu
“Sovvaļnīks” ar albumu “Napaseitynuots”, videoklipu i koncertdarbeibu

Lobuokais snāgums tautys muzykā

Folklorys kūpa “Upīte” ar dubultdisku “Dzīduot muoku, doncuot muoku” i koncertdarbeibu
Postfolklorys grupa “Rikši” ar albumu “Sieju sovu” i koncertdarbeibu
Škilbanu etnografiskais ansamblis ar izdavumu “Škilbanu sīvas”, videoklipu i koncertdarbeibu
Tradicionaluos dzīduošonys grupa “Saucējas” ar izdavumu “Trīci, munu ustabeni” i koncertdarbeibu
Tradicionaluos muzykys grupa “Tautumeitas” ar Aulejis dzīšmu gūdynuošonu i koncertdarbeibu

Lobuokais snāgums alternativajā muzykā

Apvīneiba “Ausmeņa Records” ar dzīsmi “Aust”
Grupa “Trešīs Ņutona lykums” ar videoklipim i dzīsmem
Grupa “Unknown Artis” ar dzīsmi “Reiga 13” i koncertdarbeibu
Projekts “Jezups i Muosys” ar albumu “LAI SLAVA JAM!”, videoklipu i koncertdarbeibu

Lobuokais snāgums akademiskajā muzykā

Kamerkors “Muklājs” ar albumu “Ar Laimeņu runojūt”
Rēzeknis Tehnologeju akademejis jauktais kors “Sonitum” ar albumu “Dīva pasauļs”
Rihards Zaļupe “Latgales ainavas”

Lobuokais muzykys video

“Jezups i Muosys” ft. Guntix ft. Jezups Martinovs – “Sirds. Sirds. Sidrs”
“Piparmētra” – “Elpoj”
Škilbanu etnografiskais ansamblis – “Es apsieju lynu dryvu”
“Trešīs Ņutona lykums” – “Muns/Muna”

Gada debija muzykā

Grupa “Piparmētra”
Grupa “Rūnas”
Grupa “Trešīs Ņutona lykums”
Projekts “Brāļi un māsas”

Lobuokais snāgums šlagermuzykā

“Dobeles zemessargi” ar dzīsmi “Tuoli dzeivoj”
Grupa “Baltie lāči” ar albumu “Ar draugiem” i koncertdarbeibu
Grupa “Dvinskas muzikanti” ar dzīsmis “Hej, bruoļ latgalīt” sasnāgumim i koncertdarbeibu
Tihovsku saime ar dzīsmi “Pīmiņ, bruoļ”

 

Literatura:

Lobuokais snāgums literaturā

Annele Slišāne – stāsti #100dečiLatvijai
Dagnija Dudarjonoka, Gunta Nagle, Ligija Purinaša, Jana Skrivļa-Čevere – dzejis kruojums “Linejis”
Ineta Atpile-Jugane – dzejis kruojums “Mūdynuot muokuļus”
Raibīs – stuostu kruojums “Zalta tesmini”
Sandra Ūdre, Juoņs Ryučāns – romans “Aizlauztais spaits”

Lobuokais izdavums/gruomota

Dzejis kruojums “Mūdynuot muokuļus”. Ineta Atpile-Jugane
Gruomota i audio CD “Škilbanu sīvas”. Edīte Husare, Anda Beitāne
Latgalīšu dzejis kruojums “Linejis”. Dagnija Dudarjonoka, Gunta Nagle, Ligija Purinaša, Jana Skrivļa-Čevere
Romans “Aizlauztais spaits”. Sandra Ūdre, Juoņs Ryučāns
“Viensētu koka arhitektūras savdabība Dienvidlatgalē”. Anna Lazdāne

Bolvys „Boņuks 2016” viertiešonys komisejā dorbuojās 25 pārnejuo goda bolvys sajiemieji i pīaicynuotī attīceiguos sferys puorzynuotuoji: muzikis i latgaliskūs projektu vadeituojs, Latgalīšu kulturys goda bolvys dybynuotuojs Guntis Rasims, režisors Viesturs Kairišs, varganiste Iveta Apkalna, Lūznovys muižys vadeituoja Iveta Balčūne, tulkuotuojs Guntars Godiņš, literate i žurnaliste Evika Muizniece, dzejnīks i literaturzynuotnīks Valentīns Lukaševičs, dzejneica Anita Mileika, latgalīšu tradicionaluos kulturys eksperte Ruta Cibule, režisore Māra Zaļaiskalns, komponiste Ilona Rupaine, etnomuzikologe Asnate Rancāne, literaturzynuotneica Ilga Šuplinska, dzejneica i žurnaliste Anna Rancāne, Kuorsovys nūvoda izpilddirektors Tuoms Vorkalis, producentu apvīneibys “3KM” puorstuovi, raidejuma “Sajūti Latgali!” taiseituoji Sandra i Jānis Rimicāni, muzikis Arnis Slobožaņins, komponists Andrejs Selickis, muzikis Artūrs Uškāns, portala “Latgalīšu kutlurys gazeta” vadeituoja Laura Melne, Latvejis Radejis Latgolys studejis vadeituoja Renāte Lazdiņa, latgalīšu kulturvidis aktiviste i projektu vadeituoja Edīte Husare, literats i muzikis, Latgalīšu kulturys goda bolvys dybynuotuojs Oskars Orlovs i Latgolys viestnīceibys GORS vadeituoja Diāna Zirniņa.

Svineiguo bolvys padūšonys ceremoneja byus ituo goda 26. februarī 16.00 Latgolys viestnīceibys GORS Lelajā zalā. Iz ceremoneju meili aicynuoti nominanti, viertiešonys komiseja, medeju puorstuovi i kotrys latgalīšu kulturys interesents. Svineigajā ceremonejā ar muzykalim prīšknasumim prīcēs: grupys “Dabasu Durovys”, “Piparmētra”, “Sovvaļnīks”, projekts “Jezups i Muosys”, folklorys kūpa “Upīte”, tradicionaluos muzykys grupa “Tautumeitas”, solistu apvīneiba “Jubilāri”, dzīsminīks Kārlis Kazāks, veiru kors “Graidi”, postfolklorys grupa “Rikši”, dzīsmineica Laura Bicāne. Taipat kai pārn, ari itūgod Latgalīšu kulturys goda bolva “Boņuks” byus tīšraidē radzama LMT Straume.

Latgaliešu kultūras gada balvas “Boņuks 2016” nūtikšonu atbolsta Vaļsts kulturkapitala fonds, Rēzeknis piļsātys dūme, Rēzeknis nūvoda, Aglyunys, Bolvu, Dagdys, Rībeņu, Ruguoju i Viļakys nūvodu pošvaļdeibys. Informativī atbaļsteituoji: žurnals “Ir”, Latgalīšu kulturys gazeta lakuga.lv, Latgolys radeja, “Vaduguns” i “Latgales Laiks”.

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]