Piec bīdreibys “Latgalieši” iniciativys Rēzeknē īsuokti byuvnīceibys dorbi pīminis vītys izveidei par gūdu 1917. gods Latgolys kongresa symtgadei. Pādejūs nedeļu laikā Latgolys sabīdreibā suokušuos plašys diskusejis par uzrokstim, kū vajadzātu raksteit iz poša pīminekļa i kaidā latvīšu volūdys rokstu formā tys byutu doroms.

Pīminekļa pastetiešonys vaicuojumus niu koordinej Rēzeknis piļsātys dūme, kas paradz, ka iz tūpūšuo pīminekļa varātu īgravēt Raiņa vuordus – “I Kurzeme, i Vidzeme, i Latgale mūsu”. Sovpus ūtrā pusē paradzāts teksts latgalīšu literarajā rokstu volūdā Pītera Stroda ortografejā – “1917. goda 26. un 27. aprelī p. v. st. itymā vītā kinoteatrī “Diana” nūtyka Pyrmais Latgolas latvīšu kongress, kas lēme par apsavīnōšonu ar Kūrzemi un Vidzemi”. Ari itū uzrokstu atbolsta Rēzeknis piļsātys dūmis Kulturys komiseja.

Vairuokys latgalīšu sabīdriskuos organizacejis ir izsacejušys sovys puordūmys i īrūsynuojumus ituo pīminekļa pastateišonys sakarā. Bīdreiba “Latgolys Studentu centrs” aicynuoja nūvērst napiļneibys pīminekļa tekstā, kas paradzāts latgalīšu rokstu volūdā. Sovpus Bīdreiba “Latgolys Saeima” lyudze lītuot latgalīšu rokstu volūdu kai pamatvolūdu, veidojūt pīminekļa uzrokstus. Bīdreiba “Latgaļu sāta” Raiņa citata vītā aicynoj izmontuot kaidu nu Franča Trasuna dūmu gryudim.