Imanta Zīdūņa (Ziedoņa) fonds “Viegli” aicynoj iz apbolvuojuma “Laiks Ziedonim” laureatu cyldynuošonys ceremoneju 3. majā 19.00 Latgolys viestnīceibā GORS, Rēzeknē, informej fonda puorstuove Kristīne Tjarve. Ceremonejā na tik cyldynuos laureatus kaidā nu pīcom apbolvuojuma nominacejom, nu byus ari myusdīneigu tautys muzykys aranžiejumu prīšknasumi. 

Jau catūrtū godu nūteik nūzeimeigs pasuokums Latvejis kulturys vidē – apbolvuojuma “Laiks Ziedonim” cyldynuošonys ceremoneja, kas nūtiks Imanta Zīdūņa dzimšonys dīnā, 3. majā. Kotru godu ceremoneja nūteik cytā Latvejis vītā, itūreiz aicynojūt iz sasatikšonu Latgolā, kur jau itūgod aprelī i majā, atguodojūt viesturiski nūzeimeigū Latgolys kongresa izaškieršonu i Latvejis vaļstiskuma ceļa suokys, teik izsuokta Latvejis symtgadis svieteišona.

Režisora Pītera Krilova i muzika Goran Gora veiduotajā apbolvuojuma ceremonejā skateituoji tiks cīšā saiknē ar Latgolys skaņom. “Kotra “Laiks Ziedonim” ceremoneja ir kai atsevišks stuosts, kurū raugam pastuosteit, reizē cyldynojūt fantastiskys personeibys. Tai kai ceremonejis nūtikšonys vīta ir Rēzeknis GORS, myusu fokuss itūgod byus Latgolys skanis – kai skaņ orūdi, cylvāki, telpa i vide. Kab tū izpieteitu, braucem ekspedicejuos, kurymuos sasatykom ar breineigim cylvākim. Jī tod ari palyka par myusu Latgolys skaņu viestnīkim. Kaidi beja itūs ekspediceju rezultati, redzēsim apbolvuojuma “Laiks Ziedonim” cyldynuošonys ceremonejā,” stuosta Goran Gora.

Skotivis vizualū nūformiejumu veiduojuse muokslineica Evija Pintāne. Ceremonejis vadeituoji – Renārs Kaupers, Juoņs Holšteins-Upmanis i trešais vadeituojs, kas tiks atkluots jau tyvuokajā laikā.

Sevkuram, kuram ir gribiešona vērtīs ceremoneju kluotīnē, ir vareiba īsaguoduot beletus Latgolys viestnīceibys GORS i “Biļešu Paradīze” beletu sistemuos. Beletu cenys – suocūt nu 7 EUR.

Sovukuort tim, kuri navarēs 3. majā byut Rēzeknē, byus vareiba sekuot leidza ceremonejai ar Latvejis Televizejis i Latvejis Radejis tīšraižu paleidzeibu.