Īvodūt Latgolys kongresa symtgadis nūtikšonys, 1. majā 14.00 Fraņča Trasuna muzejā “Kolnasāta” Rēzeknis nūvoda Sakstagola pogostā nūtiks vēļ nabejs pasuokums — Trasuna fabulu svātki. Itim svātkim par moto teik jimtys ryndys nu izcyluo vaļstsveira, gareidznīka i literata, Latgolys kongresa 1917. godā idejiskuo vadūņa Fraņča Trasuna (1864–1926) fabulys ailis: “Ka kūpeibā ir spāks/ Pret tū i runuot grāks!”. 

“Ka Fraņcs Trasuns dzeivuotu myusu dīnuos, kaids byutu juo aicynuojums, pret kū jis īsastuotu sovuos fabuluos i iz kaidu reiceibu aicynuotu leidzcylvākus sovys tautys, sovys vaļsts lobā? Trasuna dzymtajā sātā “Kolnasātā” sabīdreibā vaira i mozuok zynomi izgleiteibys, kulturys i sabīdriskī darbinīki, tymā skaitā muzikis Andris Eriņš, gareidznīks Rinalds Broks, uzjiemiejs Jurs Vucāns, Pluociņu Mase i cyti daleisīs ar sovu personeigū pīredzi i dzeivis stuostim, īdvasmojūt klauseituojus jaunim dorbim i dūmom,” — stuosta svātku režisore Iveta Graudiņa. Fabulu svātkūs pīsadaleis školānu skotivis runys konkursa “Vuolyudzāni” laureati, kai ari Rēzeknis teatra “Joriks” latvīšu trupys akteri.

F. Trasuna fabulu svātku apmaklātuoji varēs īsapazeit ar pa daļai atjaunuotū muzeja ekspoziceju (muokslineica Inese Dundure), kai ari nūbaudeit slovonū Sakstagola cymusu.

Pasuokumu finansiali atbolsta Rēzeknis nūvoda pošvaļdeiba i Sakstagola pogosta puorvaļde.