Jau ziņuots, ka 30. aprelī Lūznovys muižā literari muzykalais izvadums “Atlaižu” byus vīna nu pīturom ceļā iz Latvejis symtgadi Rēzeknis nūvodā. Pasasokūt apmaklātuoju atsauceibai i gribiešonai pīdzeivuot izvadumu kluotīnē, izsludynuota “Atlaižu” papyldizruode 30. aprelī 12 stuņdēs.

Literari muzykalais izvadums “Atlaižu” 30. aprelī Lūznovys muižys Sorkonajā zalā tiks izruodeits div reizis – 12.00 i 15.00. Izvadumā apsavīnuojušys vairuokys spylgtys sīvītis, kuruos pošys, koč i kur vaduši jūs celi itūšaļt, ar Latgolu ir “iz tu” – literate i žurnaliste Anna Rancāne, aktrise Vizma Kvēpa, etnomuzike Kristīne Kārkle i režisore Māra Zaļaiskalns.

Izvadums “Atlaižu”, kuruo nūsaukumā simboliski sasavynuse latviskuo “ļaušana iet” i latgaliskuo “pīdūšona”, viestej par Latgolu caur sīvītis stuostu, kas ir patīss i eistyns kai Latgolys lauki, mīlesteiba i sevkurā sātā pīdzeivuojamuo ciļvieciskuo vīnkuoršeiba, nu reizē styprys i seiksts kai kasdīnys padareitī dorbi, sīvītis spāks i napasadūšona. Annys Rancānis dzeju i prozu vuordūs izdzeivuos aktrise Vizma Kvēpa, tautysdzīsmis latviski i latgaliski izdzīduos i izspielēs Kristīne Kārkle, nu vysu kūpā vīnā izvadumā sasaisteis režisore Māra Zaļaiskalns.

Anna Rancāne ir myusu dīnu Latgolys spylgtuokuo raksteituoja – dzeja, proza i ari žurnalistikys stuosti i intervejis Annys raksteiti puorsavierš dziļūs, izjustūs, nu reizē ari styprūs dorbūs. Izvadumā “Atlaižu” Anna atlaiss publiskajam ceļam sovys dzejis i prozys ryndys, kuruos natryukst vysa sīvītis dobys kruošņuma i bīda. Vizma Kvēpa ir Rēzeknē dzymuse aktrise, kuruos rodūšais ceļš suocīs Rēzeknis Tautys teatrī, nu profesionali turpynuojīs Latvejis Nacionalajā teatrī. Puormaiņu laikūs pījimti jauni dzeivis izaicynuojumi i tepat Latvejā, i pasauļa elpys pylnajā Londonā, nu Vizmys ceļš vysod veds tī, kur sāta. Kristīne Kārkle ir itūšaļt Latvejā zynomuokuo etnomuzike, kuruos dzymtuo puse ir Leivuons. Kristīnis bolss skaņ tik daudzūs i vysaiduokūs projektūs i muzykalajuos apvīneibuos (“Raxtu raxti”, “Laimas Muzykanti”, “Brāļi un Māsas” i cytūs), ka myusu dīnu muzykys aina Latvejā nav īdūmuojama bez juos izdzīduotuom tautysdzīsmem. Māra Zaļaiskalns ir Rēzeknis Tautys teatra režisore, kuruos dorbu rūkroksts zynoms na viņ Latgolā. Muorys veiduotī izvadumi dzeivoj i iz leluoku, i mozuoku skotivu i kotru godu sajam skateituoju i kritiku atzineibu.

Beleti iz izvadumu “Atlaižu” atrūnami “Biļešu Paradīze” kasēs voi škārsteiklā. Beletu cena – 7 eiro. Lyugums jimt vārā, ka vītu skaits īrūbežuots.