Latvejis Banka šudiņ laiž apgrūzeibā pīcu eiro sudobra kolekcejis monetu “Latgales kongress”.

Monetys prīškpusē (aversā) attāluoti vysaiduoku sabīdreibys grupu puorstuovi – Latgolys kongresa dalinīki – ar sorkonboltsorkonu transparentu, iz kuruo var skaiteit Latvejis apvīnuošonys aicynuojumu. Monetys viersa daļā kairajā pusē uzroksts “5 euro”, nu lobajā pusē ir goda skaitli “1917–2017”. Sovukuort monetys aizmugurē (reversā) attāluotys sīvītis ar bārnim pi krysta, nu monetys zamoškā – uzroksts “Latgola”.

“Monetys aversā atveiduotys cylvāku figurys, kuruos simbolizej Latgolys kongresa nūtikšonys golvonūs vierzeituojus – katuoļu gareidznīkus, strelnīkus, tautškoluotuojus i sabīdriskūs darbinīkus. Nu viesturiskuos kartenis puorjimtajā iz sorkonboltsorkonuo transparenta radzamajā uzrokstā, kas atspīgeļoj vēļ nanūsastabiliziejušu latgalīšu raksteibys formu, izsaceita kongresa pamatideja. Monetys reversā attāluots krysts, ap kurū maja dzīduojumim sasapuļciejušys sīvītis ar bārnim. Maja dzīduojumi kai Latgolai rakstureiga tautys tradiceja īkļauti Latvejis kulturys kanonā,” viestej Latvejis Banka.

Itei moneta ir Latvejis Bankas pateiceiba Latgolai par īguļdejumu Latvejis vīnuoteibys i vaļstiskuma idejis atteisteibā.

Monetys dizaina i plastiskuo veiduojuma autors ir Ivars Drulle. Muokslinīku īdvasmuojuse vīna nu ratuom kongresa dalinīku karteņom.

Kolekcejis moneta “Latgales kongress” izgataveita Šveicē “Faude & Huguenin”. Monetys maksimaluo tiraža – 3000 eksemplaru, sovukuort tuos cena Latvejis Bankys kasēs – 50 eiro.

Interesenti kolekcejis monetu “Latgales kongress” varēs īsaguoduot ari Latgolys Symtgadis kongresa laikā 5. majā Latgolys viestnīceibā GORS Rēzeknē.

Monetys svineiguo atkluošona nūtiks Latgolys viestnīceibā GORS, Rēzeknē, 4. majā, eisai pyrma Latvejis Republikys Naatkareibys atjaunuošonys dīnai i Latgolys kongresa symtgadei veļteituo koncerta. Latvejis Bankys prezidents Ilmārs Rimšēvičs simboliski padūs monetys divejim vaļsti i Latgolu puorstuovūšim cylvākim – Saeimys prīšksādātuojai Inārai Mūrniecei i izcilai dzejneicai, publicistei, latgalītei Annai Rancānei.