Iz kinu vokoru aicynoj LgSC Daugovpiļs birojs
Bīdreiba “Latgolys Studentu centrs” (LgSC) sevkuru grybātuoju 23. majā 19.30 aicynoj iz Kinu vokoru Štabikā, Reigys īlā 48-3, Daugovpilī, informej Edgars Makņa.
Paguojušajā godā latgalīšu muzykys grupys “Dabasu Durovys” solists Arnis Slobožaņins kūpā ar dūmubīdrim prezentēja kinys “Pyrmī Osni” pyrmū sereju “Gambits 1917”. Kinys pamatā izmontuotys viesturiskys nūtikšonys 20. godu symta suokumā, kas radeja augleigu vidi, kab Latgola, byudama Krīvejis imperejis sastuovā, varātu atsadaleit nu Vitebskys gubernis, kab apsavīnuotu ar puorejuom latvīšu apdzeivuotajuom teritorejom. Par tū tyka lamts 1917. goda Latgolys kongresā Rēzeknē, kū pīmynūt, cieški teik atzeimeitys taidys personeibys kai Fraņcs Trasuns i Fraņcs Kemps.
Pyrmajā kinys serejā teik ruodeits Fraņča Kempa i Fraņča Trasuna dialogs Pīterpilī, kur tymā laikā suocēs latgalīšu atmūda, sovpus ūtrā serejā “Lauleibys” atveiduotys nūtikšonys 1917. goda Latgolys kongresa laikā. Ūtruo sereja skateituojim tyka prezentāta pyrms mieneša.
LgSC sadarbeibā ar kinys idejis autoru Arni Slobožaņinu pīduovoj sevkuram atīt iz Kinu vokoru Štabikā, pi sylta čaja kruškys nūsavērt kinys “Pyrmī Osni” obejis serejis i izvaicuot pošu Arni par kinys tapšonu, Latgolys kongresu i nuokameibys redzīni.
Gaideisim sevkuru ūtardiņ 23. majā, 19.30 bīdreibys “Latgolys Studentu centrs” Daugovpiļs birojā Reigys īlā 48-3.
Bīdreibys “Latgolys Studentu centrs” darbeibu 2017. godā atbolsta Vaļsts Kulturkapitala fonds.
