Bazneicu naktī Lūznovys muižā gaidoma diskuseja i Laurys Bicānis koncerts

Bazneicu naktī Lūznovys muižā gaidoma diskuseja i Laurys Bicānis koncerts

2. junī Lūznovys muiža nu jau ūtrū reizi aicynuos iz kulturys nūtikšonu “Bazneicu nakts”, ļaunūt apmaklātuojim īpazeit ari muižā asūšū kapleicu, pīsadaleit diskusejā, nūsaklauseit dzīsmineicys Laurys Bicānis koncertu i byut kluotyn vokora dīvkolpuojumā, informej muižys puorstuove Inga Drele.

Bazneicu nakts 2017 Lūznovys muižā suoksīs 16.00 ar ekskurseju, kuruos laikā varēs īpazeit i muižu, i muižys kapleicu. Piec ekskursejis 17.00 muižys Sorkonajā zalā sevkurs interesents teik aicynuots iz diskuseju “Grāka izpratne kristīteibā i folklorā”, kurū vadeis Rēzeknis Tehnologeju akademejis filologejis doktore Angelika Juško-Štekele, pīsadaleis Daugovpiļs Jezus Sirds Rūmys katuoļu draudzis prāvests Andris Ševels, Rēzeknis Jezus Sirds draudzis vikars Vitālijs Filipenoks i Latvejis pareizticeiguos Bazneicys Rēzeknis i Modyunis apriņča prāvests viersprīsters Viktors Teplovs. Diskusejā caur kristeigū i latgalīšu folklorys prizmu tiks raudzeits izzynuot, kas ir grāks, kaidi ir grāku veidi, kas grākoj vysvaira, izzynuota spoveds, grāku nūžāluošona i grāku atlaisšona.

Piec diskusejis 19.00 Lūznovys muižys kapleicā koncertu snēgs latgalīšu dzīsmineica Laura Bicāne. Laura Bicāne ir dzīsmineica nu Daugovpiļs nūvoda Vyšku. Vairuoku godu laikā izkūpuse sovu daiļradi, koncertējuse, kai ari izdavuse div studejis albumus: “Es tikai ļaujūs” (2013) i “Trīspuksti” (2015). Ituo gods majā dīnysgaismu īraudzeja ari Laurys trešais albums “Lauzīsimies cauri pūlim”, kurymā atrūnamys 10 kompozicejis latvīšu literarajā, latgalīšu i angļu volūduos – tuos byus vareiba dzierdēt ari Bazneicu nakts koncertā. Kristeiguo nūskaņa sūpluok latgaliskajam vīglumam i vysaidu volūdu skaniejumam ir vīns nu Laurys izjustuos muzykys motivim. Piec koncerta 20.00 tīpat kapleicā iz kūpeigu lyugšonu aicynuos vokora dīvkolpuojums.

Bazneicu nakts ir kulturys nūtikšona, kas kristeigūs draudžu bazneicuos nūteik vosorys suokuos, junī. Tys ir laiks, kod bazneicā īīt cytaižuok i īpazeit kulturys i gareiguos vierteibys. Bazneicu nakts Latvejā nūteik nu 2014. goda, itūgod iz nūtikšonu aicynojūt 190 Latvejis dīvnomūs. Pārņ Bazneicu nakti Latvejā apmeklēja vaira par 26 000 interesentu. Bazneicu nakts ideja da Latvejis atceļuoja nu Austrejis, kur pyrma nadaudz vaira kai 10 godu nūtyka pyrmuo itaida kristeiguos bazneicys konfeseju i draudžu kūpeigai reikuota ekumeniska nūtikšona. Dreiži piec tuo pasuokums nūtyka ari Čehejā i Slovakejā. Pasuokuma nūdūmu atbolsta Latvejis leluokūs kristeigūs konfeseju vadeituoji. Latvejā Bazneicu nakti organizej storpkonfesionala dūmubīdru grupa – nūdybynuojums “Baznīcu Nakts fonds”. 

Dasavīnojūt Bazneicu nakts nūrisei ari itūgod, Lūznovys muiža aicynoj turpynuot īpazeit te asūšo kapleicu. Piec vītejūs ļaužu nūstuostu, kapleica kaidā nu symtgadeiguos muižys telpu bejuse jau tuos eipašnīku, pūļu izceļsmis muižnīku Kerbedzu laikūs, par kū vys nav dokumentala apstyprynuojuma. Atmūdys laikā, 20. gs. 90. godūs, itamā telpā, tūreizejuos katehetis, nu jau myužeibā aizguojušuos Antoninys Sobolevskys rūsynuoti, iz lyugšonom suoce puļcētīs ticeigī. Niulenejuo muižys kapleica atkluota i īsvieteita 2015. goda februara suokuos i tān Svātais Mišs kapleicā nūteik regulari, kotru svātdīni.  

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]