Itūreiz raidejuma “Pi myusim Latgolā” veiduotuoji viestej par gona jaunu kulturys nūtikšonu, kas lelim sūlim īguojuse ari Latgolā – akceju Bazneicu nakts. Itūgod pasuokuma ītvorūs sovys durovys attaiseis 17 Latgolys bazneicys. Kab dazynuotu vaira par Bazneicu nakti, Laura Sondore-Strode nūbrauce iz Stiernīni.

Stiernīnis Sv. Laurencija Rūmys katuoļu bazneica akcejā Bazneicu nakts pīsadaleis pyrmū reizi. Draudzes pravests Viktors Petrovskis stuosta, ka nabyus nikaidu jaunu avanturu. Bazneiba byus attaiseita sevkuram apmaklātuojam, byus vareiba vīnuotīs kūpeigā lyugšonā, varganiste nūspielēs kaidu skaņdorbu i byus vareiba dabuot gareigū literaturu.

Koč i Stiernīnis bazneica zynoma ar sovu boguotū viesturi, oltora gleznom i varganem, pravests nūruoda, ka bazneicā svareiguokuos ir gareiguos vierteibys i Vyssvātuokais Sakraments.

Vaira par nūtikšonom ap Stiernīnis bazneicu raidejumā stuosta Antonina Sondore.

Vaira klausīs raidejumā “Pi myusim Latgolā”:

Drukavuot