Myusu dīnu muokslys galereja, kas atsarūn Leivuonā, aicynoj iz goda jubileja svieteišonu, kas nūtiks 15. julī nu 19.00, informej galerejis puorstuove Lāsma Vindule.

Goda jubilejs tiks atzeimuots ar Myusu dīnu muokslys galerejis idejis autora i vadeituoja Raimonda Vinduļa personalizstuodi “Posters of the day”. Izstuodei radeitajūs dorbūs lakoniskā, skorbā i dzeivā volūdā atsabolsoj autoram aktualī vaicuojumi i atsacejumi iz tim. “Itymūs dorbūs gribu komunicēt ar skateituoju izlosūt “dzedu metodis” – kod plakats kolpuoja kai idejis, suopis, prīcys voi sabīdreibys informiešonys volūda. Piec zynomys laika distaņcis pajamūt (aizajamūt) sev atpazeistamu sajiutu, volūdu, tālus, ļuovu tim atsabolsuot i aizasnēgt vēļ nabejušuos dimeņsejuos,” tūpūšo izstuodi raksturoj Raimonds Vindulis.

Eipaši Myusu dīnu muokslys galerejis jubilejam performaņci “Zelta stūrakmeņi” radejs muokslinīks Armands Grundulis. Autors tū sauc par styurakmiņu atpazeišonys, atjaunuošonys, speidynuošonys i aktualiziešonys akceju: “Senejūs laikūs apzynuotai atsevišku religisku kusteibu ceļtnēs, vīnā nu kuorma styuru, naīlyka akmini, tai nūruodūt iz golvonū kuorma cāluoju — Radeituoju ar lelū burtu, kuram atvālāts kuormu pabeigt. Iztryukstūšais styurakmiņs beja kai naasūšs līcinīks i nūruode iz vierteibu olūtu. Līcinīks naradzamam, tok kluotyn asūšam “Vierteibu kuorma” garantam, nu paaudzis iz paaudzi. Pamats i īmeslis ciļviecis spiejai turpynuotīs, vierteibu puormontuojameibai i religiski, i sekulari organizātai sabīdreibai.” Performaņcē tiks izmontuota Gata Pastara radeita elektroniskuos muzykys kompilaceja.

Sovukuort Myusu dīnu muokslys galerejis pogolmā jubileja ītvorūs uzastuos Latvejis pankroka grupa “Inokentijs Mārpls”. Grupa ir legendara ar sovu īguļdejumu pankroka atteisteibā Latvejā, kas kluot vēļ teik skaiteita par PSRS hardcore muzykys žanra aizsuociejim.

Goda darbeibys laikā Myusu dīnu muokslys galereja ir organizējuse vaira par 50 bezmoksys pasuokumus – izstuodis, meistardarbneicys, lekcejis, performaņcis, koncertus i cytys nūtikšonys. Galerejis mierkis ir sekmēt vysaidys muokslys izpausmis regionā i veicynuot tūs daīmameibu vītejim dzeivuotuojim, nūdrūsynojūt kvalitativu i inovativu kulturys pasuokumu pīduovuojumu. Galerejis dorbu organizej bīdreiba “Galerija”. Tei atsarūn Reigys īlā 108a, Leivuonā, galerejis apmekliejums – bez moksys, dorba laiks – nu trešdīnis da sastdīnis nu 12.00 da 18.00.