“Pi myusim Latgolā” sasateik ar jaunajim pošvaļdeibu vadeituojim

“Pi myusim Latgolā” sasateik ar jaunajim pošvaļdeibu vadeituojim

Juņa suokumā vysā Latvejā nūtyka pošvaļdeibu vieliešonys. Niu pādejūs nedeļu laikā Latgolā nūtyka pyrmuos jaunīvālātūs pošvaļdeibu deputatu sēdis, kurymuos tyka īvālāti jaunūs pošvaļdeibu vadeituoji. Raidejumā “Pi myusim Latgolā” Tenis Bikovskis sasatyka ar Daugovpiļs, Bolvu i Ludzys jaunīvālātajim pošvaļdeibu vadeituojim, kab dazynuotu jūs darbeibys planus nuokušajim četrim godim.

Par Daugovpiļs pilsātys dūmis prīšksādātuoju niu īvālāts Andrejs Elksniņš. Juodazeimej, ka Elksniņš ari pyrma vieliešonu beja puorlīcynuots, ka vālātuoji byus jam labvieleigi. Elksniņš nūruoda, ka niu juo pīnuokums ir struoduot Daugovpiļs dzeivuotuoju lobā – radeit vaira dorba vītu, nūdrūsynuot piļsātys dzeivuotuojim bezmoksys sabīdriskū transportu i radeit labvieleigu vidi jaunīšim, kab jī palyktu Daugovpilī. Andreja Elksniņa vītnīks Rihards Eigims dasoka, ka nūteikti tiks turpynuots dorbs pi Daugovpiļs lidūstys projekta, investiceju pīsaistis piļsātai, kai arī dzeivis kvalitatis uzlobuošonys.

Sovpus bejušais Daugovpiļs dūmis prīšksādātuojs Juoņs Lāčplēsis nūruoda, ka ir pamats dūmuot, ka jaunuo piļsātys vadeiba itaidā sastuovā ilgi naspēs struoduot, i itūšaļt div politiskuos partejis, kurys tykušys piļsātys vadeibā, izmoksoj duorguok nakai septenis paguojušajā sasaukumā. Taipoš Lāčplēsis nūruoda, ka jaunuo piļsātys vadeiba, suocūt sovu dorbu, roda jaunys omota vītys sovim atbaļsteituojim i veic izmainis pošvaļdeibys nūlykumā.

Jauns dūmis prīšksādātuojs īvālāts ari Bolvu nūvodā. Niu turpmuokūs četrus godus Bolvu nūvoda pošvaļdeibu vadeis Aigars Pušpurs. Jis nūruoda, ka juoturpynoj īprīkšejuos dūmis īsuoktais dorbs, dalīkūt kluotyn svežnuoku redzīni. Jis pastreipoj, ka juoatteista na viņ nūvoda centrs – Bolvu piļsāta, nu ari pogosti, taipoš juorauga radeit jaunys dorba vītys. Pušpurs skaita, ka pošvaļdeibai juostruodoj sovu dzeivuotuoju lobā. Bejušais Bolvu nūvoda dūmis prīšksādātuojs Andris Kazinovskis nūruoda, ka Aigars Pušpurs ir daudzsūlūšs kandidats dūmis prīšksādātuoja omotam.

Ari Ludzys nūvoda dūmei niu byus jauns prīšksādātuojs – Edgars Mekšs. Ari Mekšs nūruoda, ka juoturpynoj īsuoktais dorbs, juorealizej dažaidi jau īsuoktī projekti, kai arī juodasaista finansiejums jaunu ideju realiziešonai. Taipoš jis pastreipoj, ka juorysynoj dažaidi sadzeiviski vaicuojumi, dzeivuotuoju dzeivis leimiņa uzlobuošonai.

Kalenders

Jul
15
Ūtr
19:00 Leivuona piļsātys svātki @ Leivuons
Leivuona piļsātys svātki @ Leivuons
Jul 15 @ 19:00 – Jul 19 @ 23:45
Ar pylnu svātku programu var īpasazeit ITE.
Jul
17
Cat
19:00 Izruode “Mazpiļsāta” @ "Ulbrokas pērle"
Izruode “Mazpiļsāta” @ "Ulbrokas pērle"
Jul 17 @ 19:00 – 21:00
“Pannas Teātris” skateituojim pīduovoj izruodi – slovonuokuos myusu dīnu Latgolys lugu autoris Danskovītis jaunuokū komedeju. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei, Jānim Skanim voi Jurim Lisneram runuot ari latgaliski[...]
Jul
18
Pīk
all-day Vikys Ekstys izstuode “Bēres Slo... @ galereja "Alma"
Vikys Ekstys izstuode “Bēres Slo... @ galereja "Alma"
Jul 18 all-day
Galerejā “Alma” byus apsaverama Reigys Fotografejis bienalis “Next 2025” programā īkļautuo Vikys Ekstys personalizstuode “Bēres Slobodā”. Izstuodis kuratore ir Astrīda Riņke. Dokumentalū video par ituos izstuodis dorbu kopiešonys procesu analogajā foto laboratorejā taisejs Kristians Fukss. [...]