Itūreiz raidejuma “Pi myusim Latgolā” veidotuoji gastej Preiļūs. Tī atsarūn leluokais Latgolys pīna puorstruodis uzjāmums “Preiļu siers”. Žurnalists Tenis Bikovskis sasatyka ar A/S “Preiļu siers” vaļdis prīšksādātuoju Jezupu Šnepstu, kab dazynuotu vaira par pīna ražuošonys i puorstruodis nūzari Latgolā i Latvejā.

Jezups Šnepsts stuosta, ka sovys pastuoviešonys laikā uzjāmums audzs i atsateistejs. “Preiļu sīrs” na viņ ražoj sīrus i cytus gordumus, puorstruodojūt pīnu, nu ari uztur sovu gonompulku i īpierk pīnu nu vītejūs zemnīku. Juodazeimoj, ka itam uzjāmumam ir div meitys uzjāmumi Kruoslovā i Daugovpilī.

Kai pastuosteja Jezups Šnepsts, juo vadeitais uzjāmums ražoj pīna produkceju na viņ Latgolys ci Latvejis patārātuojim, nu ari eksportam. Uzjāmumam ir gona lobi ruodeituoji, Šnepstam bejuši ari pīduovojumi tū puordūt, tok jis taidus pīduovojumus nimoz naapsver, partū ka uzjāmuma vierteiba aug kotru godu.