“Auļi” i “Tautumeitas” izdūd kūpeigu albumu

“Auļi” i “Tautumeitas” izdūd kūpeigu albumu

Reitu, 29. julī, Āraišu arheologiskajā parkā byus grupu “Auļi” i “Tautumeitas” kūpeiguo projekta – albuma “Lai māsiņa rotājās” – atkluošonys svātki, breivdobys dižkoncerts. Albumā vysu dzīšmu vydā skaņ ari latgaliski īdzīduotys dzīsmis.

Ni “Auļi”, ni ari “Tautumeitas” Latvejis muzykys laukā poši par sevi niu komentarus naprosa, bet obejis spieceiguos muzykaluos apvīneibys niu byus dzierdamys ari vīnā kūpeigā albumā, kurymā vydā ir 13 dzīšmu. Albumā teik izspālāts i izdzīduots cylvāka dzeivē svareigais preceibu i kuozu pūsmys. “Auļu” kuliņu i bungu styprais skaniejums puorstuov veiriškū spāku, bet “Tautumeitas” ar izteikti maiguoku skaniejumu, nu vys tik spāka pylnū daudzbaļseigū dzīduošonu, puorstuov sīviškū. Taipat kai dzeivē jaunam puoram piec kuozu ir juoīsavuica sadzeivuot, kab vīns napuormuoktu ūtra, tai i muzykā “Auļi” i “Tautumeitas” vaicoj saskanis, vīnam ūtru papyldynojūt. Grupu sadarbeiba suocēs 2016. goda decembrī, kod tuos iz vīnys skotivis sasatyka izgleitojūšā koncertu cyklā školu jaunuotnei “Muzyka tev. Birzīs un norās”, kod 8 koncertūs raudzeja školānim paleidzēt izzynuot latvyskū dzeivisziņu. Ka “Auļim” jaunais albums byus grupys diskografejā sastais, tod “Tautumeitom” itys ir pyrmais tik apjūmeigais īroksts.

Tyvuokūs mienešu laikā albuma koncertprograma izskanēs vairuokuos Latvejis vītuos, kurūs vydā byus ari Rēzekne. Programys topšonā īsaisteiti 17 obeju grupu muziki, kurūs varēs redzēt ari koncertūs. “Lai māsiņa rotājās” skanēs 26. augustā Latgolys viestnīceibā GORS, 29. septembrī Vydszemis koncertzalā “Cēsis” i 13. oktobrī Jelgovys kulturys nomā. Beleti – “Biļešu Paradīze” kasēs i škārsteiklā.

Albuma “Lai māsiņa rotājās” izdeviejs ir tradicionaluos kulturys menedžmenta centrys “Lauska”. Albumu var vaicuot “Lauska” škārsteikla veikalā lauska.lv i muzykys īrokstu veikalūs, kai ari dreiži bīdreibys “Latgolys Studentu centrs” gruomotu goldā i taiseitslatgola.lv.

Albuma dzīšmu saroksts:

  1. Manā lopu laidarā
  2. Neviens mīļi tā nebrauca
  3. Dzied’ papriekšu, brāļa māsa
  4. Netīšāmi es iegāju
  5. Sēdēja muoseņa aiz galdeņa
  6. Nu ar Dievu
  7. Ko zinu gaidīt
  8. Es jauna būdama
  9. Dej, eglīte
  10. Voi, vacuokīs buolelini
  11. Ama jama, muosenis
  12. Beņķa kāja
  13. Aulejas klezmers

“Auļi” ir kuliņu i bungu muzykys grupa, kurymā spēlej 10 muziki – 9 puiškini nu Latvejis i 1 mārga nu Igaunejis. Grupys izaveiduošonys īcere – apvīnuot kulinis ar sytaminstrumentim, izkūpūt itaida veida muzyku Latvejā. Praktiskys līceibys par bungu i kuliņu spēlis tradiceju senejūs laikūs ir sasaglobuojušs moz, nu vys tik itū instrumentu spēlēšona atseviški i kūpā ir pīsaukta latvīšu folklorys materialūs vysā cieški. “Auļi” pamatā spēlej instrumentalū muzyku. Grupys repertuaru veidoj originalkompozicejis, latvīšu daņču i kuliū melodeju aranžiejumi, cytu Eiropys tautu melodejis, kai ari kompozicejis instrumentim. Grupys muzykā izapauž tuos dalinīku jaunrade i myusdīneiguo apsavieršona iz tradicionalū kulturu. Vaira par grupu

Grupys “Tautumeitas” muzyku veido seši bolsi i seši rūku puori. Grupys dalineicys ir latvīšu mārgys, kuruos tyc, ka muzyka dora itū pasauli lobuoku. Eipaši tyva dalineicom ir tradicionaluo dzīduošona, jo seviški daudzbaļseiba. Leluokuo daļa nu grupys dalineiču ir studiejušys etnomuzykologeju, deļ tuo muzykā dzierdami ari motivi nu cytu tautu muzykys. Pyrma vaira nikai goda LaKuGa jau raudzeja vaicuot “Kas ir “Tautumeitas”?”

Rokstu sagataveja: Edeite Husare


Print Friendly, PDF & Email

Nūtikšonu kalendars

Jun
22
Ūtr
19:00 Mieginuojumi Upeitis stadionā @ Upeitis stadions
Mieginuojumi Upeitis stadionā @ Upeitis stadions
Jun 22 @ 19:00 – 21:30
Mieginuojumi Upeitis stadionā @ Upeitis stadions
22.06. Upeitis stadionā nūtiks vairuoku amatierkolektivu mieginuojumi, kas tiks apskaņuoti, leidz ar tū byus skaļuoki.  Itūgod Andris Slišāns īsoka i aicynoj vosorys saulgrīžus svinēt i īleiguot sovys muojsaimnīceibys ītvorūs, tok, ka gribīs īt i pasaklauseit[...]
Jun
26
Sai
17:00 Literaruos sarunys ar Aldi Bukšu... @ Lūznavys muiža
Literaruos sarunys ar Aldi Bukšu... @ Lūznavys muiža
Jun 26 @ 17:00
Literaruos sarunys ar Aldi Bukšu Lūznavys muižā @ Lūznavys muiža
Eisi piec Juoņu i Leigū svātku – 26. junī 17.00 stuņdēs Lūznavys muižā byus sarunu cikla “Literārās sarunas Lūznavas muižā” 2020./2021. goda sezonys nūslādzūšais pasuokums – sarunys ar romanu “Parādu piedzinēji” i “Bruoli” autoru Aldi[...]
Jun
27
Svā
20:00 Māra Čačkys personalizstuode “Kl... @ Daugovpiļs Nūvodpietnīceibys i muokslys muzejs
Māra Čačkys personalizstuode “Kl... @ Daugovpiļs Nūvodpietnīceibys i muokslys muzejs
Jun 27 @ 20:00
Māra Čačkys personalizstuode "Klātienes dialogi" Daugovpilī @ Daugovpiļs Nūvodpietnīceibys i muokslys muzejs
Nu 7. leidz 27 juņam Daugovpiļs Nūvodpietnīceibys i muokslys muzejā var apsavērt muokslinīka Māra Čačkys lelformata dorbu personaliztuodi “Klātienes dialogi”. Izstuode īzeimej sasatikšonu jeb īspieju otkol apmeklēt muzejus i izstuodis kluotīnē, publiski sasatikt ar Māra[...]
Jun
29
Ūtr
20:00 Pīterdīna tīšraidē nu Rogovkys
Pīterdīna tīšraidē nu Rogovkys
Jun 29 @ 20:00
Pīterdīna tīšraidē nu Rogovkys
Itūgod Pīterdīna 20.00 stuņdēs nūtiks tīšraidē nu Rogovkys centra, nalobvieleigu laika apstuokļu gadejumā – nu Nautrānu sporta hallis-KN (vērtīs Nautrānu sporta hallis-KN “Facebook.com” kontā). Namaineiga Rogovkā ir tradiceja 29. junī svieteit Pīterdīnu, kod nautrānīši gūdynoj dzejnīku[...]
Jul
4
Svā
20:00 Tematiskuo izstuode “Politiķei, ... @ Latgolys Kulturviesturis muzejs
Tematiskuo izstuode “Politiķei, ... @ Latgolys Kulturviesturis muzejs
Jul 4 @ 20:00
Tematiskuo izstuode "Politiķei, pedagoģei un sabiedriskajai darbiniecei V. Seilei 130" @ Latgolys Kulturviesturis muzejs
Atzeimejūt pedagogis, politikis i sabīdryskuos darbinīcis Valerejis Seilis (1891-1970) 130 jubileju, nu 15. maja da 4. juļa Latgolys Kulturviesturis muzejā varēs apskateit tematiskū izstuodi par gūdu V. Seilei, kai ari īsapazeit ar juos davumu i[...]