Daugovpilī byus apsaverama Latgolys pūdnīceibys izstuode

Daugovpilī byus apsaverama Latgolys pūdnīceibys izstuode

17. augustā 17.00 Daugovpiļs Muola muokslys centrā (18. novembra īlā 18) tiks atkluota Latgolys pūdnīceibys izstuode “Kopā. Pa ceļam. Paceļam”, viestej informaceja Daugovpiļs piļsātys sātys lopā.

Latgolys pūdnīceibys tradiceja nazkod paredzēja tū, ka omota meistari vysbīžuok apsavīnuoja, vīnojūt nūteiktā teritorejā dzeivojūšus i muolu apstruodojūšus pūdnīkus. Tradiceja laika gaitā ir mainejusēs. Izstuode “Kopā. Pa ceļam. Paceļam”, kuruos tematiskū īvierzi ir izalasejs tautys lītiškuos muokslys studejis “Rēzeknes apriņķa pūdnīki” vadeituojs Andris Ušpelis, paruoda tūs meistaru veikumu, kuri dzeivoj ceļā nu Olyuksnis, Bieržpiļs, Preiļu i Rēzeknis da Daugovpiļs i Kruoslovys.

Koč i mainejusēs tradiceja, tok radeišonys ceļš, kurū īt muola meistari, vys vēļ ir atkluojumu i pīredzis boguots. Vys vēļ Latgolys keramikā nūzeimeiguokais ir muola trauku lītiškais pīlītuojums, trauku apdadzynuošona Latgolys dūbis tipa atkluotys guņs keramikys apdadzynuošonys cepļūs. Ar eistynu gondarejumu cylvāki tur rūkuos tikū nu cepļa izjimtus syltus traukus, kuri ir glazāti voi reducāti, voi ari veikta tūs apstruode pīnā. Izstuodis ekspoziceja paruoda tūs radūšūs ceļus, kaidus staigoj pūdnīki, kab tyktu da eista muola pūda.

Izstuode byus apsaverama da 17. septembra Muola muokslys centra dorba laikā: ūtardiņ – sastdiņ 12.00 – 18.00, svātdiņ 12.00 – 16.00.

Print Friendly, PDF & Email

Nūtikšonu kalendars