Itūreiz raidejuma “Pi myusim Latgolā” veiduotuoji rauga īpazeit latgalīšu iesšonys parodumus. Kaidā nu breivdobys pasuokumu žurnaliste Laura Sondore-Strode, bāgūt nu uzbuozeiguo šašlyku smuorda, atroduse Juoni Jurčenko i juo buseņā puorvītojamū āstuvi “LOBO PANINI MAIZE”.

Juoņs Jurčenko jau ūtru sezonu breivdobys pasuokumūs latgalīšu vādarus lutynoj ar itaļu korstmaizem. Jau studeju laikā jis paspiejs pastruoduot ādynuošonys jūmā, bet tod jis vēļ pasabeida īguļdeit leidzekļus sova uzjāmuma veiduošonai. Piec kaida nu pasuokumu, brūkaškuos gatavejūt tostermaizis, jis secynuoja, ka koč kū leidzeigu varātu pīduovuot ari izbraukumu tierdznīceibā.

Koč i pīprasejums piec itaidu gordumu ir gona lels, Juoņs soka, ka jis viņ taustuos i rauga saprast, kas tod ir tei eistuo klientu auditoreja. Runojūt par latgalīšu iesšonys parodumim, jis smejās, ka pats golvonais ir gaļa i ols.

Niu Juoņam ir leli plani – nūpierkt leluoku buseņu, pījimt vēļ vīnu darbinīku, pīduovuot klientim na viņ itaļu maizeitis, bet ari grīku kuknis lobumus. Taipoš jis planavoj klientus mudynuot dūmuot zali, lai piec breivdobys pasuokumu napalyktu aizmāsluotys pļovys.

Juoņs Jurčenko stuosta, ka nu 11 godu vacuma raudziejs kruot dorba pīredzi i pa itū laiku ir saprats, ka jam napateik prīkšnīki. Deļtuo jis suoce sovu uzjiemiejdarbeibu.