Trešū godu tiks padūta J. Pīguožņa bolva Latvejis ainovu gleznīceibā
![Trešū godu tiks padūta J. Pīguožņa bolva Latvejis ainovu gleznīceibā](https://www.lakuga.lv/wp-content/uploads/2017/08/pigozna-bolva-1000x667-c-default.jpg)
16. septembrī 14.00 Preiļu kulturys noma lelajā zalā nūtiks Jezupa Pīguožņa bolvys Latvejis ainovu gleznīceibā padūšonys ceremoneja, viestej Preiļu nūvoda sātyslopa. Pasuokumu vadeis akters Juoņs Paukštello, muzicēs folklorys kūpa “Rūžupes veiri”.
Itūgod Jezupa Pīguožņa bolvys Latvejis ainovu gleznīceibā izstuode puļcēja 135 dažaidu tauteibu i vacuma muokslinīku nu vysys Latvejis, kas žūrejis viertiejumam īsnīdze 238 muokslys dorbus. Jezupa Pīguožņa bolvys Latvejis ainovu gleznīceibā konkursa izstuodei žūreja izraudzeja 97 autoru 125 dorbus.
Itūgod žūrejā dorbus viertēja: žūrejis prīšksādātuoja, muokslineica Silva Linarte (Jezupa Pīguožņa bolvys Latvejis ainovu gleznīceibā golvonuos bolvys laureate 2016. godā), muokslineica Vita Merca (Jezupa Pīguožņa bolvys Latvejis ainovu gleznīceibā konkursa izstuodē 2015. godā sajēme laikroksta “Latvijas Avīze” specialbolvu), muokslys zynuotneica Ingrīda Burāne, muokslinīki Jurs Gērmanis, Kārlis Siliņš, Juoņs Anmanis i Juoņs Strupulis.
Jezupa Pīguožņa bolvys Latvejis ainovu gleznīceibā golvonuos bolvys pretendenti tyka paziņuoti izstuodis atkluošonā Reigys Sv. Pītera bazneicā Jezupa dīnā – 19. martā. Tī ir: Agra Ritiņa (Rēzekne), Nugzars Paksadze (Jiurmola), Aldis Kļaviņš (Līpuoja), Madara Gulbis (Reiga), Alberts Pauliņš (Tukums), Meldra Bula (Reiga), Andrejs Gērmanis (Reiga). Bolvys sajiemiejs tiks nūsaukts 16. septembrī Preiļūs.
Laikā nu 11. da 15. septembra Preiļūs nūtiks 3. Jezupa Pīguožņa vuordā nūsauktais profesionalūs muokslinīku pleners. Itūgod tymā puorstuovāti byus vysi Latvejis regioni i ari Lītova. 15. septembrī Preiļu kulturys nomā tiks svieteita Jezupa Pīguožņa dzimšonys dīna ar plenera dorbu izstuodis atkluošonu i muokslinīku pīsadaleišonu. Kotrys muokslinīks vysmoz vīnu dorbu duovuos tūpūšajam Latvejis ainovu muzejam Preiļūs.
Jezupa Pīguožņa bolvys Latvejis ainovu gleznīceibā konkursa izstuode apmaklātuojim byus atdareita Preiļu kulturys noma izstuožu zalā (2. stuovā) nu 30. augusta. Daļa nu konkursa izstuodis dorbu byus apsaverami Latgolys Kulturviesturis muzejā Rēzeknē nu 2. septembra. Novembra beiguos izstuode ceļuos iz Bauskys nūvodpietnīceibys i muokslys muzeju. Apmaklātuojim byus vareiba nūbolsuot par sovu izvālātū gleznu. Sevkuram, nu eipaši uzjiemiejim, ir vareiba pasnēgt sovu simpateju bolvu lobuokajai izstuodis ainovai pasuokuma laikā 16. septembrī.
Jezupa Pīguožņa bolvu Latvejis ainovu gleznīceibā 2015. godā īdybynuoja Preiļu nūvoda dūme i Reigys dūme sadarbeibā ar Reigys pošvaļdeibys kulturys īstuožu apvīneibys Reigys Sv. Pītera bazneicys puorvaļdi, Preiļu Viesturis i lītiškuos muokslys muzeju, Latvejis Zynuotņu akademeju, Latvejis Muokslys akademeju, Juoņa Anmaņa Jaunūs talantu atbolsta fondu i idejis autorim – kinorežisoru i gleznuotuoju Juoni Streiču i muokslinīkim Juoni Anmani i Juoni Strupuli. 2015. godā golvonū bolvu sajēme Latvejis Universitatis profesors, muokslinīks Roberts Muzis, 2016. godā – muokslineica Silva Linarte.