“Pi myusim Latgolā” par slāgtū Brīžucīma pamatškolu

“Pi myusim Latgolā” par slāgtū Brīžucīma pamatškolu

Turpynojūt sovu ceļu pa Zīmeļlatgolu, raidejuma “Pi myusim Latgolā” veiduotuoji gastej Brīžucīmā, kur eisai pyrma jaunuo vuiceibu goda slāgta pamatškola. Kab dazynuotu vaira par rodušūs situaceju, Brīžucīma pamatškolā gasteja Tenis Bikovskis.

Augusta beiguos aizritēja pādejuos dorba dīnys Brīžucīma pamatškolā. Vysai skumeiga atmosfera, zynūt, ka itū godu 1. septembrī ite školys zvons vaira nasauks iz pyrmū stundi. Školys direktors Aigars Keišs pastuosteja, ka Brīžucīma pamatškolā vuicejušīs 19 bārni i niu leluokuo daļa nūlāmuši školys gaitys turpynuot Baļtinovā.

Direktors i pedagogi atguodoj dīnu, kod tyka paziņuots Bolvu nūvoda lāmums par školys likvidiešonu – daļa bārnu itū viesti sajēme ar osorom acīs. Niu bārnim līgta vareiba sajimt pamatizgleiteibu tepat pi sātys. Taipoš byus gryuts, ka natiks organizāti školānu autobusa papyldreisi.

Bolvu nūvoda pošvaļdeibys izgleiteibys puorvaļdis puorstuovi nūruoda, ka lāmumu par školys likvidiešonu pījēme īprīkšejais deputatu sasaukums, i nūruoda, ka moza škola navar snēgt atbylstūšu izgleiteibys kvalitati. Tok Brīžucīma školys absolvente Aiva Ūzuleņa (Ozoliņa) stuosta, ka ite školuotuoji ir zalts, kas prūt vysu sakuortuot pa plauktenim.

Print Friendly, PDF & Email