Jau 9. septembrī Raiņa muzejā Juosmuižā Eiropys kulturys montuojuma dīnu ītvorūs nūtiks Dzejis dīnys. Kab dazynuotu vaira par pasuokuma programu i pošu muzeju, raidejumā “Pi myusim Latgolā” žurnaliste Laura Sondore-Strode sasatyka ar muzeja vadeituoju Solvitu Brūveri.

Raiņa muzejs Juosmuižā eipašs ar tū, ka slavanais dzejnīks ite pavadejs sovus jauneibys godus i tīši ite īsaviers Tekleitē, par kuru gona daudzi rakstejs ari sovā dīnysgruomotā.

Muzeja saimineica Solvita Brūvere pastuosteja, ka palics cīši moz līceibu nu tuo laika, kod Raiņs ite dzeivuojs. Puorsvorā sasaglobuojuse juo sarakste ar muosu i dīnysgruomotys. Vīneigais dzejūļs latgaliski “Muna jaunu dīnu zeme” ari veļteits itai vītai.

Niu muzejā bez Raiņa apsaverama ari Latgolys keramikys izstuode i rūkdorbi. Muzejā izveiduota interaktiva ekspoziceja, kurā var na viņ redzēt, nu ari dzierdēt Raini i Aspazeju.

9. septembrī Solvita Brūvere aicynoj iz dzejis dīnom veļteitū pasuokumu, kur atrast nūdarbi vareiba byus sevkuram. Pasuokuma ītvorūs tiks atdareita bārnu dzejūļu gruomota “Garā pupa 2017”, ar dzejis lasejumim uzastuos Inese Zandere i Indra Brūvere-Daruliene, kai ari gasteis muokslinīks i animacejis kinu režisors Edmunds Jansons.