Nu 26. septembra kotru ūtardīnis vokoru 21.10 televizejis kanalā LNT byus radzams raidejums “Atklāj Latgolu ar Kristapu Rasimu”, informej televizejis puorstuove Raita Celma. Jaunajā raidejumā akters, muzikis i eistyns Latgolys patriots Kristaps Rasims kūpā ar kaidu labi zynomu Latvejis slaveneibu dūsīs aizraujūšā ekskursejā iz Latgolu.

“Tai jau reizem saīt, ka mes naradzam dimantus sovā pogolmā, partū raidejumā dūsimēs tūs vaicuot i puorsalīcynuot, ka Latgola ir cīši boguots nūvods. Nūvodam ir sovs dobys skaistums, tradicejis, inovacejis i sirsneigi cylvāki, kurī struodoj, ceinejās, stuov i kreit par Latgolu, zeimojās, ka ari par vysu Latveju! Koč i asu īdzymts latgalīts, itymā ceļuojumā cīši daudz kū atkluoju sev. I, prūtams, naizpalyka bez puorsteigumu,” stuosta Kristaps.

Pyrmajā raidejumā dzīduotuojs Ralfs Eilands izzynuos, kaidys ir sajiutys, kod puor seju ruopoj ļumeigi veinglīmieži i izmieginuos saceņseibys ar Latgolys rykšuotuojim. Nuokušajūs raidejumūs Latgolu atkluos LNT reita raidejuma “900 sekundes” vadeituoja Kristīne Garklāva i LNT laika ziņu vadeituojs Kristaps Tālbergs, dzīduotuojs Miks Dukurs, aktrise Zane Dombrovska, muzikis Dons, dzīduotuoja Elza Rozentāle, akters Andris Bulis i dzīduotuojs Goran Gora. Raidejums veiduots sadarbeibā ar Vaļsts kulturkapitala fonda finansialu atbolstu.

LNT sātyslopā, izspielejūt interaktivu spēli, byus vareiba izzynuot, cik daudz latgalīša ir kotrā nu myusu, bet sastdīnis reitūs radejā “Star FM” varēs dzierdēt pošu raidejumu veiduotuoju i gostu pīdzeivuotū filmiešonys laikā, kai ari tikt pi vierteigu bolvu, atbyldūt iz eipašim vaicuojumim par Latgolu.

Karteņa: Juoņs Deinats (nu LaKuGys arhiva)