Itūreiz raidejums “Pi myusim Latgolā” svietej sovpateigys dzejis dīnys, kū Viļakys nūvoda Upeitē sovulaik īdybynuojs dzejnīks Ontons Slišāns. Laikā, kod kreit uobeli, Upeitē teik reikuots latgalīšu dzejis i muzykys festivals “Upītes uobeļduorzs”.

“Septembris ir dzejis mieness. Pījimts reikuot dzejis dīnys. Bet, ka uztaisi dzejis dīnys, klauseituoji ir tod, kod atvad bārnus nu školys. Atīt pīci, četri, seši cylvāki pasaklauseit. Nav populari klauseitīs dzeju, lai cik lobu tū raksteitu. Tod izdūmuoja, ka var sovaižuok pīsaisteit jaunīšus klauseitīs, ka [muzykys] grupys dalīk kluot,” par sova tāva, dzejnīka Ontona Slišana īdybynuotū tradiceju stuosta Andris Slišāns.

“Upītes uobeļduorzs” nūteik jau sešpadsmytū godu. Kotru godu koncepceja ir leidzeiga, bet nūskaņa sovaiduoka. Izaruod, ka 2002. godā pyrmajā festivalā pīsadaleja pīcys muzykys grupys i treis dzejnīki, niu dalinīku skaits ir īvāruojami pīaudzs, ka pat nakts ir par eisu.