Vuorkovā nūtiks vakariešona par volūdys vaicuojumim

Vuorkovā nūtiks vakariešona par volūdys vaicuojumim

Itymā nedeļgolā Vuorkovys nūvodu apmeklēs gosti nu Reigys i Rēzeknis — volūdys pietnīki Sanda Rapa i Armands Kūceņš. Jūs interesej izzynuot Vuorkovys nūvoda dzeivuotuoju volūdys lītojumu i vītvuordu izaceļšonu. Deļtuo gasteišonys laikā jī gryb sasatikt ar cylvākim, kuri varātumem pastuosteit koč kū par nūvoda vītvuordim, vacvuordim, mutvuordu folkloru.

Sastdiņ 30. septembrī, sešuos stuņdēs vokorā Kulturys centra zalā (Školys īlā 5, Vacvuorkovā) vysi aicynuoti iz vakariešonu. Vokora gaitā latgalīšu kulturys entuziasts Armands Kūceņš pastuosteis par Sibirī dzeivojūšajim vuorkavīšim, kuri 1899. godā aizbrauce dzeivuot iz Tomskys apgobola Kryvašeinys rajonu. Ekspedicejis laikā ir pīfiļmāti video i sataiseitys biļdis, kurys vokorā tiks vysim paruodātys. Īspiejams, ka Sibirī dzeivojūšī latgalīši ar pavuordem Dambeits, Dolgais, Gavars, Lozdāns, Onckuļs, Plyuda, Pluoņs, Pūdžs, Rusiņs, Spūļs, Strods, Šnepsts, Vaivods, Vonogs, Vuolonts i Zeile ir niulinejūs Vuorkovys nūvoda dzeivuotuoju rodi.

Latvejis Universiteta Latvīšu volūdys instituta pietneica Sanda Rapa pastuosteis par vītvuordu tolku i instituta pietejumim. Daudzi godu garumā jei pietej dažaidu vītu vītvuordu nūsaukumus i tūs izaceļšonu.

Iz vakariešonu aicynuoti ir vysi, kurim iņteresej volūdys i viesturis vaicojumi. Taipoš gosti gryb dzierdēt ari Vuorkovys nūvoda dzeivuotuoju stuostus, dzīsmis, folkloru i c. Iz itū šaļti jau ir apzynuoti naz cik cylvāku, kuri gryb i var pastuosteit pietnīkim nūdereigu informaceju, tok vysleidze aicynuoti atsasaukt ari cyti.

Vaira informacejis zvonūt pa tel. nr.  20385972 (Dagneja).

Print Friendly, PDF & Email

Nūtikšonu kalendars

Nov
30
Tre
vysu dīnu Izstuode “Trīs no “Osīšiem”” @ Latgolys Centraluo biblioteka
Izstuode “Trīs no “Osīšiem”” @ Latgolys Centraluo biblioteka
Nov 30 vysu dīnu
Leidz 30. novembram Latgolys Centraluos bibliotekys Daiļliteraturys sektorā apsaverama Guru saimis gleznu izstuode “Trīs no “Osīšiem”. Ekspozicejis autoris dažu godu laikā kruoja muokslys dorbus, nu kurūs daudzi jau ir sajāmuši atzineibu ari cytuos izstuodēs. Skateituojam[...]